چار سال بعد نواز شریف کی پاکستان آمد کل

دبئی/اسلام آباد: سابق وزیرِ اعظم میاں نواز شریف کا پاکستان روانگی سے قبل آج دبئی میں قیام کا آخری روز ہے۔مسلم لیگ ن کے قائد و سابق وزیرِ اعظم نواز شریف آج دبئی میں انتہائی مصروف دن گزاریں گے۔دبئی حکومت کی ایک اعلیٰ شخصیت کی نواز شریف سے اسحاق ڈار کے بیٹوں کے گھر پر ملاقات ہوئی ہے جو تقریباً آدھا گھنٹہ جاری رہی۔اس ملاقات میں پاکستان میں سرمایہ کاری سمیت باہمی دلچسپی کے امور پر گفتگو ہوئی جبکہ نواز شریف کی آج مختلف وفود سے بھی ملاقاتیں طے ہیں۔دوسری جانب نواز شریف کے ساتھ پاکستان جانے والے لیگی کارکنوں کی بڑی تعداد بھی دبئی پہنچ گئی ہے۔واضح رہے کہ نواز شریف کل 4 سال بعد اپنے وطن کی سر زمین پر اتریں گے۔نواز شریف مینارِ پاکستان پر جلسے سے خطاب میں آئندہ کے لائحہ عمل کا اعلان بھی کریں گے۔ادھرسابق وزیراعظم نواز شریف کے استقبال کے لیے ملک بھر سے قافلے لاہور کی جانب رواں دواں ہیں، چلاس، سکردو اور گلگت سے پاکستان مسلم لیگ ن کا قافلہ مانسہرہ پہنچ گیا ہے۔استقبالی قافلے کی قیادت وزیر زراعت انجینئر محمد انور اور اکبر تابان کر رہے ہیں، قافلے میں 300 کے لگ بھگ چھوٹی بڑی گاڑیاں ہیں۔مانسہرہ کے مقام پر سابق وزیر سردار یوسف نے انجینئر انور کے قافلے کا استقبال کیا اور بڑی ریلی نکالنے پر مبارکباد پیش کی۔اس موقع پر انجینئر محمد انور کا کہنا تھا کہ نواز شریف تمام بحرانوں کا علاج ہے، ہزاروں کارکنوں کو لے کر مینار پاکستان پہنچیں گے۔ان کا کہنا تھا کہ ریلی کے استقبال کرنے پر ہم سردار یوسف اور مسلم لیگ مانسہرہ کا شکریہ ادا کرتے ہیں۔