امت شاہ کے دورے کے بعد مغربی اترپردیش کا سیاسی پارہ بڑھا

مرادآباد:04اپریل(یواین آئی) بی جے پی کے سابق صدر و مرکزی وزیر داخلہ امت شاہ کے دورے کے بعد مغربی اترپردیش میں سیاسی سرگرمی میں زبردست تیزی آئی ہے۔
مغربی اتر پردیش کی انتخابی سیاست میں کھیت۔کھلہان اور دھرتی پتروں کا اہم رول ہے۔ پہلے اور دوسرے مرحلے کے انتخابات یہاں 19 اور 26 اپریل کو ہونے ہیں۔ لوک سبھا انتخابی عمل کے آغاز کے ساتھ ہی تمام سیاسی جماعتوں نے اپنی مہم تیز کر دی ہے۔
مرکزی وزیر داخلہ امت شاہ نے بدھ کو مرادآباد میں لوک سبھا انتخابات کی تیاریوں کے سلسلے میں میرٹھ، سہارنپور اور مرادآباد ڈویژن کے بی جے پی تنظیم سے وابستہ عہدیداروں سے رائے لینے کے بعد ضروری ہدایات دی ہیں۔
اتر پردیش میں تقریباً ڈھائی مہینے تک چلنے والے انتخابی عمل کو مدنظر رکھتے ہوئے تمام بڑی سیاسی پارٹیاں زور دار مہم چلانے کی حکمت عملی کے تحت تمام سیٹوں پر انتخابی مہم میں مصروف ہیں۔ لوک سبھا انتخابات کے پہلے مرحلے میں 19 اپریل کو مغربی اتر پردیش کی آٹھ سیٹوں بشمول مراد آباد، رام پور، نگینہ، بجنور، سہارنپور، بلند شہر، کیرانہ اور مظفر نگر میں ووٹ ڈالے جائیں گے۔وہیں دوسرے مرحلے میں میرٹھ، امروہہ، باغپت، غازی آباد، گوتم بدھ نگر نوئیڈا، بلند شہر، علی گڑھ اور متھرا شامل ہیں۔
مغربی اتر پردیش کے 14 اضلاع کی دلت مسلم اکثریتی آبادی کے اتحاد کی وجہ سے، سماج وادی پارٹی (ایس پی)، بہوجن سماج پارٹی (بی ایس پی) اتحاد نے 2019 میں 14 میں سے سات سیٹوں پر کامیابی حاصل کی تھی۔مسلم اکثریتی نشستوں پر بہوجن سماج پارٹی (بی ایس پی) نے امروہہ، نگینہ، بجنور اور سہارنپور اور اس کی اتحادی جماعت سماج وادی پارٹی (ایس پی) نے مرادآباد، رام پور اور سنبھل سیٹوں پر کامیابی حاصل کی تھی۔ تاہم یہ الگ بات ہے کہ ضمنی انتخاب میں بھارتیہ جنتا پارٹی (بی جے پی) نے سماج وادی پارٹی (ایس پی) کو شکست دے کر رام پور سیٹ جیت لی تھی۔
اتر پردیش میں اس بار بہوجن سماج پارٹی (بی ایس پی) تنہا انتخابی میدان میں ہے۔ دوسری طرف، سماج وادی پارٹی (ایس پی) اور کانگریس اتحاد میں ہیں، جب کہ راشٹریہ لوک دل (آر ایل ڈی) اور بھارتیہ جنتا پارٹی (بی جے پی) مل کر الیکشن لڑ رہے ہیں۔ انتخابات میں انڈیا اتحاد جمہوریت کو بچانے کا نعرہ لگا رہا ہے، دوسری جانب وزیر اعظم نریندر مودی نے میرٹھ میں جلسے سے انتخابات کا افتتاح کرتے ہوئے پی ایم مودی کی بدعنوانی کے خاتمے کی گارنٹی کے ساتھ انتخابی بگل بجا دیا ہے۔
مغربی اتر پردیش میں دلت ووٹروں کی خاصی آبادی ہے، جب کہ دوسری طرف مسلم ووٹروں کی تعداد 23 سے 42 فیصد ہے۔ لہذا، دلت مسلم اتحاد نے ہمیشہ بھارتیہ جنتا پارٹی (بی جے پی) پر بھاری پڑتا رہا ہے۔ اتحاد کی وجہ سے، بہوجن سماج پارٹی (بی ایس پی) نے 2019 کے لوک سبھا انتخابات میں امروہہ، بجنور، نگینہ سہارنپور جیسی مسلم دلت اکثریت والی سیٹوں پر کامیابی حاصل کی تھی۔وہیں اس کی اتحادی جماعت سماج وادی پارٹی (ایس پی) نے مرادآباد، رام پور اور سنبھل سیٹوں پر کامیابی حاصل کی تھی۔ دوسری طرف بھارتیہ جنتا پارٹی (بی جے پی) نے میرٹھ، علی گڑھ، بلند شہر، باغپت اور مظفر نگر کی سیٹیوں پر جیت درج کی تھی۔
اب 2024 کے انتخابات میں مغربی اتر پردیش میں 14 سیٹوں پر سیاسی جماعتوں کے درمیان مقابلہ ہے، جب کہ بھارتیہ جنتا پارٹی کو ووٹ فیصد بڑھانے کا چیلنج درپیش ہے، جب کہ سماج وادی پارٹی (ایس پی)، کانگریس اتحاد اور بہوجن سماج پارٹی ( بی ایس پی) میں مسلم ووٹوں کو بکھراؤ روکنے کو لے کر فکر مند حامیوں کے درمیان میٹنگ کا دور لگاتار جاری ہے۔درحقیقت ذات پات کی مساوات اور ووٹوں کا پولرائزیشن مغربی اتر پردیش کے مزاج پر حاوی رہتاہے۔ سیاسی حلقوں میں اس بات کو لے کر مباحثہ زوروں پر ہے کہ 19 اور 26 اپریل کو ہونے والے پہلے اور دوسرے مرحلے کے انتخابات سے ایک یا دو دن قبل یہ فیصلہ ہو جائے گا کہ مسلم ووٹروں کا جھکاؤ کس پارٹی کی طرف ہے۔