آگرہ : گنیش وسرجن کے دوران چھ نوجوان ڈوبے، تین کو بچا لیا گیا

آگرہ (یو این آئی) اتر پردیش میں آگرہ کے نیو آگرہ علاقے میں جمعرات کو گنیش وسرجن کے دوران جمنا ندی میں چھ نوجوانوں کے ڈوبنے کا خدشہ ہے، حالانکہ ان میں سے تین کو بچا لیا گیا ہے۔پولیس فی الحال سرکاری طور پر ڈوبنے والے نوجوانوں کی تعداد بتانے سے قاصر ہے۔ جائے وقوع پر ریسکیو اور ریلیف کا کام جاری ہے۔عینی شاہدین کے مطابق چھ نوجوان دریا میں اترے تھے۔ سب گہرائی میں چلے گئے اور ڈوبنے لگے۔ انہیں ڈوبتے دیکھ کر موقع پر کہرام مچ گیا۔ تیراکوں نے فوری طور پر تین نوجوانوں کو باہر نکالا لیکن تین اتنے دور چلے گئے کہ ان کا پتہ نہیں چل سکا۔ اطلاع ملتے ہی پولیس اور غوطہ خوروں کی ایک ٹیم پہنچ گئی، جو نوجوانوں کی تلاش کر رہی ہے۔ فائر بریگیڈ کو بھی موقع پر طلب کر لیا گیا ہے۔گنیش وسرجن کے لئے صبح سے ہی گھاٹوں پر بھیڑ تھی۔ شام تک، زیادہ تر گھاٹوں پر وسرجن پرامن طریقے سے مکمل ہو گیا، تاہم، نیو آگرہ کے کھاسپورہ گاؤں کے نزدیک شام میں مورتی کے وسرجن کے دوران، کچھ نوجوان یمنا ندی میں اترے۔ نوجوان اندر جانے کے بعد ڈوبنے لگے۔ تین نوجوانوں کو لوگوں نے بچا لیا لیکن تین گہرے پانی میں پھنس گئے۔ ان کے ڈوبنے پر چیخ وپکار مچ گئی۔ گاؤں والے بھی آگئے۔
پولیس کو اطلاع دی گئی۔ پولیس نے غوطہ خوروں اور فائر بریگیڈ کو طلب کیا۔ ریسکیو کام جاری ہے۔ اندھیرے کی وجہ سے پریشانی ہو رہی ہے۔ آس پاس کے لوگوں کا کہنا ہے کہ تین افراد ڈوب گئے ہیں جب کہ تین کو غوطہ خوروں نے بچا لیا۔ایڈیشنل پولیس کمشنر تاج سیکورٹی سید اریب احمد نے بتایا کہ وسرجن کے دوران کچھ نوجوانوں کے ڈوبنے کی اطلاع ملی تھی۔ ریسکیو آپریشن جاری ہے۔ ڈوبنے والے نوجوانوں کی صحیح تعداد کا اب تک پتہ نہیں چل سکا ہے۔