محققین کا دعویٰ ہے کہ دنیا بھر میں ہر سال 83 لاکھ افراد پولوشن سے موت کے منہ میں چلے جاتے ہیں
نئی دہلی: ہندوستان میں ہر سال فضائی آلودگی کی وجہ سے بیس لاکھ سے زائد افراد ہلاک ہو جاتے ہیں۔ یہ بات بی ایم جے نامی تحقیقی جریدے میں شائع ہونے والی ایک تحقیق میں سامنے آئی ہے۔ خبر رساں ایجنسی پی ٹی آئی کے مطابق فضائی آلودگی سے صرف چین میں ہندوستان سے زیادہ اموات ہوئی ہیں۔
اس تحقیق سے یہ بات بھی سامنے آئی ہے کہ صنعتی شعبوں، توانائی کی پیداوار اور نقل و حمل وغیرہ میں فوسل فیول کا استعمال دنیا بھر میں ہر سال 50 لاکھ سے زائد افراد کی موت کا سبب بنتا ہے۔ محققین نے کہا ہے کہ سال 2019 میں کیے گئے جائزے کے مطابق دنیا بھر میں ہر سال 83 لاکھ افراد فضائی آلودگی کی وجہ سے موت کے منہ میں چلے جاتے ہیں۔ ایسی صورت حال میں جیواشم ایندھن کے استعمال سے ہونے والی اموات کل اموات کا 61 فیصد بنتی ہیں جن سے صاف اور قابل تجدید توانائی کے استعمال سے بچا جا سکتا ہے۔
