دو برسوں کے توقف کے بعد امسال 18 تا 21 نومبر کو ہوگا مدھیہ پردیش کی راجدھانی میں بڑا پروگرام
نئی دہلی/ بھوپال(ہندوستان ایکسپریس ویب ڈیسک): مدھیہ پردیش کی راجدھانی بھوپال میں منعقد ہونے والے عالمی تبلیغی اجتماع کی تاریخ کا اعلان کردیا گیا ہے۔ ذہن نشیں رہے کہ کورونا کے سبب 2020 اور2021 میں عالمی تبلیغی اجتماع کا انعقاد نہیں ہو سکا تھا، لیکن امسال حالات سازگار ہونے کے بعد مقامی انتظامیہ کی جانب سے پروگرام کی اجازت مل گئی ہے اوریوں عالمی اجتماع کمیٹی نے چار روزہ عالمی تبلیغی اجتماع کے انعقاد کی تاریخ کا بھی اعلان کردیا ہے۔خبرہے کہ عالمی تبلیغی اجتماع کا آغاز 18 نومبر سے درس قران سے ہوگا اور اکیس نومبر کو اجتماعی دعا کے ساتھ بھوپال کے چار روزہ عالمی تبلیغی اجتماع کااختتام ہوگا۔یہ جانکاری نیوز 18 کی خبر میں دیتے ہوئے بتایا گیا ہے کہ عالمی اجتماع میں بیرون ممالک سے آنے والی جماعتوں کو لے کر ابھی تک کوئی حتمی فیصلہ نہیں ہوسکا ہے۔
واضح رہے کہ نوابوں کی نگری بھوپال میں عالمی تبلیغی اجتماع کی بنیاد 1944 میں رکھی گئی تھی۔ ابتدائی سالوں میں اجتماع میں مقامی لوگوں کے ساتھ بھوپال سے باہر کے چند جماعتوں نے شرکت کی تھی،لیکن جب رفتہ رفتہ اجتماع کی اہمیت بڑھتی گئی اوراس میں نہ صرف مدھیہ پردیش کے باہرسے لوگوں نے شرکت شروع کی بلکہ 70 کی دہائی میں اجتماع نے عالمی شہرت حاصل کی۔ 2019 کے عالمی اجتماع میں 22 ممالک کی جماعتوں کے ساتھ 15 لاکھ سے زائد فرزندان توحید نے شرکت کی۔
سال 2001 تک عالمی تبلیغی اجتماع کا انعقاد بھوپال میں ایشیا کی بڑی مسجد تاج المساجد میں ہوتا رہا اور تاج المساجد نے اپنی تنگ دامنی کی شکایت کی تو عالمی اجتماع کو تاج المساجد سے بھوپال شہر سے 15 کلو میٹر دور اینٹ کھیڑی میں منتقل کیا گیا۔ امسال بھی عالمی اجتماع کا انعقاد بھوپال کے اینٹ کھیڑی میں ہی ہوگا۔
چار روزہ عالمی تبلیغی اجتماع کے انعقاد اور اس کی تیاریوں سے متعلق جب نیوز18 اردو نے عالمی اجتماع کمیٹی کے ترجمان حاجی عتیق الاسلام سے بات کی تو انہوں نے بتایا کہ چار روزہ عالمی تبلیغی اجتماع کا آغاز 18 نومبر سے ہوگا اور 21 نومبرکو اجتماعی دعا کے ساتھ عالمی تبلیغی اجتماع کا اختتام ہوگا۔
حاجی عتیق الاسلام سے جب بیرون ممالک کی جماعتوں کی شرکت کے تعلق سے پوچھا گیا تو انہوں نے بتایا کہ ابھی تک بیرون ممالک کی جماعتوں کی شرکت کے تعلق سے کوئی خبر نہیں آئی۔بیرون ممالک سے جماعتیوں آئیں گی کہ نہیں آئینگی اس تعلق سے ابھی کچھ کہا جا سکتا ہے۔ اگر بیرون ممالک سے کوئی جماعت آتی ہے تو اس کااستقبال ہے اورنہیں آتی ہے تو بھی عالمی اجتماع اپنی روایت کے مطابق منعقد ہوگا۔ ہمارا مقصد اللہ کا پیغام اللہ کے بندوں تک پہنچانا ہے۔
