کا نگریس کے 45 امیدواروں کی دوسری فہرست جاری ، سابق کرکٹرکو جوبلی ہلز اسمبلی حلقہ سے میدان میں اتارا گیا
نئی دہلی (یو این آئی) کانگریس نے تلنگانہ اسمبلی انتخابات کے لیے 45 امیدواروں کی دوسری فہرست جاری کرتے ہوئے سابق کرکٹر محمد اظہر الدین کو میدان میں اتارا ہے۔یہ معلومات دیتے ہوئے کانگریس کے جنرل سکریٹری کے سی وینوگوپال نے جمعہ کو کہا کہ پارٹی کی سنٹرل الیکشن کمیٹی نے دوسری فہرست میں اعلان کردہ امیدواروں کے ناموں کو منظوری دی ہے۔
پارٹی نے کرکٹ ٹیم کے سابق کپتان محمد اظہر الدین کو جوبلی ہلز اسمبلی حلقہ سے میدان میں اتارا ہے۔ پارٹی نے لال بہادر نگر سے سینئر لیڈر اور سابق لوک سبھا ممبر مدھو گوڑ یاسکھی کو ٹکٹ دیا ہے۔کانگریس 15 اکتوبر کو ریاستی اسمبلی انتخابات کے لیے 55 امیدواروں کی پہلی فہرست کا اعلان کرچکی ہے۔
تلنگانہ کی 119 رکنی اسمبلی میں ووٹنگ 30 نومبر کو ہوگی اور ووٹوں کی گنتی 3 دسمبر کوکی جائے گی۔ ریاستی اسمبلی کے انتخابات میں اہم مقابلہ بھارت راشٹرا سمیتی، بھارتیہ جنتا پارٹی اور کانگریس کے درمیان ہونے کی امید ہے۔
تازہ فہرست میں کانگریس نے کئی اہم سیٹوں کے لیے امیدواروں کے نام کا اعلان کیا ہے۔ بی آر ایس چیف اور تلنگانہ کے وزیر اعلیٰ کے. چندرشیکھر راؤ کے خلاف سدیپیٹ سیٹ سے پجالا ہری کرشن کو ٹکٹ دیا گیا ہے۔ علاوہ ازیں اس فہرست میں کے. راج گوپال ریڈی کو منوگوڈے، مرلی نائک کو محبوب آباد اور رابن ریڈی کو امبرپیٹ سے امیدوار بنایا گیا ہے۔
واضح رہے کہ تلنگانہ کی 119 رکنی اسمبلی کے لیے کانگریس نے اب تک 100 امیدواروں کا اعلان کر دیا ہے۔ پارٹی نے پہلی فہرست میں 55 اور اب دوسری فہرست میں 45 امیدواروں کے نام کا اعلان کیا ہے۔ جلد ہی پارٹی بقیہ بچی ہوئی سیٹوں پر بھی اپنے امیدواروں کا اعلان کرے گی۔
قابل ذکر ہے کہ تلنگانہ میں 30 نومبر کو ووٹنگ ہوگی اور نتائج 3 دسمبر کو برآمد ہوں گے۔ 2018 کے تلنگانہ اسمبلی انتخاب میں کے. چندرشیکھر راؤ کی بی آر ایس (پہلے پارٹی کا نام ٹی آر ایس تھا) کو اکثریت ملی تھی۔ بی آر ایس نے 88 سیٹوں پر جیت درج کی تھی جبکہ کانگریس نے 19 سیٹ حاصل کیے تھے۔ اسدالدین اویسی کی پارٹی اے آئی ایم آئی ایم نے 7 سیٹوں پر اور بی جے پی نے ایک سیٹ پر جیت درج کی تھی۔
