اب راہل گاندھی کا کارواں مدھیہ پردیش میں داخل ہوگا
جلگاؤں جامود، 20 نومبر (یو این آئی) ریاست میں کانگریس لیڈر راہل گاندھی کی قیادت میں بھارت جوڑو یاترا اتوار کی شام مہاراشٹر کے بلڈھانہ ضلع کے نیم کھیڑ میں ‘لائٹ آف یونیٹی’ کے ساتھ اختتام پذیر ہوئی اور اب یہ یاترا اگلا مرحلہ میں مدھیہ پردیش میں داخل ہوگی۔ اس موقع پر مسٹر گاندھی نے کہا، ’’مہاراشٹر کے لوگوں نے گزشتہ 14 دنوں میں بھارت جوڑو یاترا کے لئے بے پناہ محبت اور اعتماد کا مظاہرہ کیا ہے۔ مجھے چھترپتی شیواجی مہاراج، راجرشی شاہو مہاراج، مہاتما پھولے، ڈاکٹر بابا صاحب امبیڈکر کی سرزمین سے جو تجربہ ملا وہ ناقابل فراموش ر ہے گا۔
انہوں نے کہا کہ مہاراشٹر میں پد یاترا کے دوران ریاست کے مختلف سماجی گروہوں کے کسانوں، نوجوانوں، خواتین، دلتوں، پسماندہ لوگوں سے ملاقات ہوئی، انہوں نے اپنے مسائل، درد اور دکھ بانٹے۔ لوگوں نے ملک کی موجودہ سیاسی اور سماجی صورتحال پر بھی بات کی۔ مختلف تنظیموں اور اداروں کے نمائندوں اور دانشوروں سے ملاقات ہوئی اور ان کی طرف سے دی گئی معلومات میرے لیے اہم ہیں۔ میں مہاراشٹر کے اس تجربے کو کبھی نہیں بھولوں گا۔ انہوں نے سب کا شکریہ ادا کیا اور آخر میں ‘جئے مہاراشٹرا’ کے ساتھ اپنی تقریر کا اختتام کیا۔بھارت جوڑو یاترا کل مدھیہ پردیش کے برہان پور شہر میں داخل ہوگی۔
