اٹاوہ(یواین آئی) سماج وادی پارٹی(ایس پی) اکھلیش یادو نے دعوی کیا کہ لوک سبھا الیکشن میں بی جے پی اب تک کی سب سے بڑی ہار کا ریکارڈ بنانے جارہی ہے۔جسونت نگر اسمبلی کے ایس ایس میموریل اسکول میں مین پوری کی پارلیمانی سیٹ اور امیدوار ڈمپل یادو کی حمایت میں ایک انتخابی ریلی سے خطاب کرتے ہوئے انہوں نے کہا کہ الکٹورل بانڈ کا معاملہ سامنے آنے کے بعد بی جے پی دنیا کی سب سے بڑی بدعنوانی بن گئی ہے۔ پہلے مرحلے کے انتخاب کے بعد بی جے پی کا صفایا ہونے کے اشارے مل چکے ہیں اور آخری مرحلے کے الیکشن تک بی جے پی کا پوری طرح سے صفایا ہوجائے گا۔
یادو نے کہا کہ ان کی تنظیم کا نام انڈیا اتحادہے لیکن بی جے پی لیڈر جان بوجھ کر انڈیا الائنس کو انڈی الائنس کہتے ہیں۔ انڈیا اتحاد میں واضح طور پر اشارہ کیا گیا ہے کہ انڈیا کا مطلب انڈیا ہے، لیکن بی جے پی والے نہیں جانتے کہ انھوں نے کون سی انگریزی پڑھی ہے، کہ وہ انڈیا کو انڈی پڑھتے ہیں۔
انہوں نے کہا کہ پہلے مرحلے کی ووٹنگ کے بعد بی جے پی لیڈروں کی تقریریں بدلنے لگی ہیں۔ پہلے مرحلے میں ہی پارلیمانی انتخابات کا رجحان واضح ہو گیا ہے۔ اس بار کسان، مزدور، دلت سبھی بی جے پی کے خلاف کھڑے ہیں۔ پی ڈی اے خاندان نے این ڈی اے کو پوری طرح سے جھٹکا دیا ہے۔
ایس پی صدر نے کہا کہ بی جے پی کا جھوٹ ملک والوں کے سامنے آ گیا ہے۔ بی جے پی نے اپنے منشور میں جو کچھ بھی کہا اور پیش کیا، سب کچھ کسی نہ کسی حد تک جھوٹ لگتا ہے۔ انتخابی بانڈ گھپلہ جس طرح سامنے آیا ہے، اس نے بی جے پی کو بے نقاب کر دیا ہے۔بی جے پی نے چندے کے نام پر کھلی وصولی کی ہے جسے دوسرے لفظوں میں غیر قانونی وصولی کہا جا سکتا ہے۔ آج تک کسی حکومت نے اتنی وصولی نہیں کی۔
یادو نے کہا کہ بی جے پی حکومت نے صنعت کاروں کے 16 لاکھ کروڑ روپے معاف کر دیے ہیں اور بی جے پی نے ان کی کمپنیوں سے بڑے پیمانے پر چندہ لیا ہے، جس کے نتیجے میں آج ہم سب کو مہنگائی کا سامنا کرنا پڑرہا ہے۔
انڈیا اتحاد کی حکومت کسانوں کو نہ صرف ایم ایس پی فراہم کرے گی بلکہ انہیں قرض معافی کا حق بھی دے گی۔ بی جے پی نے کسی غریب کا قرض معاف نہیں کیا ہے بلکہ ان امیر لوگوں کا قرض معاف کیا ہے جنہوں نے کم از کم 5 کروڑ روپے کا قرض لیا ہے۔
انہوں نے کہا کہ انتخابات کے اعلان کے بعد بی جے پی نے کسانوں کے لیڈر چودھری چرن سنگھ کو بھارت رتن سے نوازا تھا۔ بی جے پی نے کبھی بھی سوامی ناتھن کمیشن کی رپورٹ کو نافذ نہیں ہونے دیا اگر کمیشن کی رپورٹ پر عمل ہوتا تو کسانوں کو کبھی مشکلات کا سامنا نہ کرنا پڑتا۔
انہوں نے کہا کہ انڈیا اتحاد اتر پردیش میں بھارتیہ جنتا پارٹی سے زیادہ سیٹیں جیتنے جا رہا ہے، اگر اس بار اس سے محروم رہے تو شاید ووٹ کا حق ختم ہو جائے اور بی جے پی آئین کو بھی ختم کر دے۔
