امیٹھی:12مئی(یواین آئی) اترپردیش کے وزیر اعلی یوگی آدتیہ ناتھ نے امیٹھی میں کانگریس کو ہدف تنقید بناتے ہوئے کہا کہ کانگریس اقتدار میں آکر ملک میں جزیہ کا نظام نافذ کرنا چاہتی ہے۔یوگی نے اتوار کو یہاں ایک ریلی سے خطاب کرتے ہوئے کہا کہ کانگریس ہندوستان میں مغل عہد کا جزیہ نافذ کرنا چاہتی ہے۔ انہوں نے سوال کیا کیا آگ پول ایسا ٹیکس نافذ ہونےدیں گے۔ انہوں نے آگے کہا کہ کانگریس کی حکومت میں جب دہشت گرد اندر گھس جاتے تھے تو کہا جاتا تھا کہ سرحد پار سے آیا ہے اب سرحد پار ہونے سے قبل ہی دہشت گردوں کو جہنم رسید کردیا جاتا ہے۔وزیر اعلیٰ نے کہا کہ جو فیصلہ امیٹھی کے لوگوں نے پہلی بار کیا تھا اس نے یہ ثابت کیا کہ امیٹھی کے لوگ ہندوستان کی ترقی کا گواہ بنیں گے۔ میں اسمرتی ایرانی جی کو مبارکباد دینا چاہوں گا کیونکہ انہوں نے پچھلے 5 سالوں میں جتنی بار امیٹھی لوک سبھا کا دورہ کیا ہے اتنا کانگریس مشترکہ طور پر بھی نہیں کر پائی تھی۔
یوگی نے اسمرتی ایرانی کی تعریف کرتے ہوئے کہا کہ ایسا لیڈر کیسا ہونا چاہیے کہ وزارت کے پروگراموں کے ذریعے پورے ملک کا دورہ کرنے کے بعد بھی وہ اپنے حلقے سے مسلسل رابطے میں رہے۔ میں دیکھتا تھا اسمرتی جی کو ہر ہفتے ان کا دورہ امیٹھی کے کسی نہ کسی اسمبلی حلقے میں کسی نہ کسی علاقے میں کسی نہ کسی گاؤں میں یہاں کی عوام کے ساتھ لگتا تھا۔انہوں نے کہا کہ جب اچھے عوامی نمائندے منتخب ہوتے ہیں تو نتائج بھی اچھے ہوتے ہیں۔ میں ایک بار پھر آپ کے درمیان اچھے نتائج کی اپیل کرنے آیا ہوں۔ تین مراحل مکمل ہو چکے ہیں۔ ملک بھر میں انتخابات کا چوتھا مرحلہ کل ہے۔کل 10 ریاستوں میں 40 سیٹوں کے لیے انتخابات ہیں۔ تین مرحلوں میں ملک بھر میں پھیلی مودی لہر اب سونامی لہر بننے جا رہی ہے۔وزیر اعلیٰ نے کہا کہ مودی جی کی قیادت میں ملک کی عزت بڑھی ہے، ملک کی سرحدیں محفوظ ہوئی ہیں، دہشت گردی اور نکسل ازم کمزور ہوا ہے، بڑے ترقیاتی کام ہوئے ہیں۔ ہائی وے، ریلوے، ایک ضلع ایک پروڈکٹ، ہر گھر نل سکیم، ہر تحصیل میں فائر سٹیشن اور غریبوں کی فلاح و بہبود جیسی سکیموں کا سیلاب ہے۔بھارت میں 80 کروڑ لوگوں کو مفت راشن دیا جا رہا ہے۔ پاکستان میں 25 کروڑ لوگ بھوک سے مر رہے ہیں۔ پورے ہندوستان کے کسانوں کو سمان ندھی، تمام خاندانوں کو بیت الخلا، غریبوں کو گھردیا گیا۔ تب کانگریس کیا کر رہی تھی؟ یہاں کے غریبوں کو گھر یا بیت الخلاء فراہم نہیں کر سکے تھے۔
