ملک کی بیٹیاں خواتین پر ہونے والے مظالم سے خوفزدہ : الکالامبا

نئی دہلی (یو این آئی) مہیلا کانگریس کی صدر الکا لامبا نے کہا ہے کہ گزشتہ دو مہینوں میں ملک کی 20 ریاستوں کا دورہ کرنے کے بعد انہوں نے دیکھا کہ خواتین کے خلاف مظالم ہو رہے ہیں اور ملک بھر میں بیٹیاں خوف زدہ ہیں جمعرات کو یہاں کانگریس ہیڈکوارٹر میں ایک پریس کانفرنس سے خطاب کرتے ہوئے محترمہ لامبا نے کہا، "8 مارچ کو خواتین کا عالمی دن ہے عزت مآب صدرجمہوریہ ہند دروپدی مرمو، وزیر اعظم نریندر مودی اور دیگر کل خواتین کو مبارکباد دیں گے میں نے گزشتہ 60 دنوں میں 20 ریاستوں کا دورہ کیا، اس دوران میں نے دیکھا کہ ملک میں خواتین کے خلاف جرائم میں اضافہ ہوا ہے۔ آج ملک کی بیٹیاں اور ان کے گھر والے خوف و دہشت میں جی رہے ہیں۔ اترپردیش کے کانپور میں دو بچیوں کی اجتماعی عصمت دری کی گئی، انہوں نے پھندا لگاکر جان دے دی۔ اب ان لڑکیوں کے والد نے بھی خودکشی کر لی ہے۔ پورے ملک میں بیٹیاں غیر محفوظ اور پریشان ہیں۔ گزشتہ 60 دنوں میں مہیلا کانگریس کی ساتھیوں نے 20 ریاستوں کا دورہ کیا۔”
انہوں نے کہا، "میں چیلنج کرتی ہوں کہ ملک کی خواتین اور بچوں کی ترقی کی وزیر اسمرتی ایرانی، خواتین کمیشن کی چیئرپرسن اور بی جے پی مہیلا مورچہ کی صدر بتائیں کہ آپ نے گزشتہ دو ماہ میں کن ریاستوں کا دورہ کیا، آپ نے کتنے متاثرین سے ملاقات کی؟ کتنے لوگوں کو انصاف دلایا۔ یہ تینوں خواتین جرم پر خاموش ہیں، کیونکہ بیٹیوں کے خلاف جرائم کرنے والوں کو یا تو اقتدار کا تحفظ حاصل ہے یا پھر اقتدار میں شریک ہیں۔”
مہیلا کانگریس صدر نے مزید کہا، "دس سال گزرنے کے بعد بھی نربھیا فنڈ کا 30 فیصد بھی خرچ نہیں کیا گیا ہے۔ کیوں کہ اس نربھیا فنڈ پر بی جے پی حکومت کنڈلی مار کربیٹھی ہے، جو بیٹی بچاؤ کا کھوکھلا نعرہ دیتی ہے۔ "