جے پورکی کیمیکل فیکٹری میں آگ لگی، 5 مزدور ہلاک

جے پور، 23 مارچ (یو این آئی) راجستھان کے جے پور ضلع کے بسی علاقے میں آج ایک کیمیکل فیکٹری میں بھیانک آتشزدگی سے پانچ مزدوروں کی موت ہو گئی جب کہ دو شدید طور پر جھلس گئے۔موصولہ اطلاعات کے مطابق علاقے کے بیناڈا میں واقع ایک کیمیکل فیکٹری میں شام تقریباً 6.30 بجے بوائلر پھٹنے سے آگ بھڑک اٹھی اور اس نے ایک خطرناک شکل اختیار کر لی جس میں پانچ مزدور موقع پر ہی دم توڑ گئے۔زخمیوں کو جے پور کے ایم ایم ایس اسپتال میں داخل کرایا گیا ہے جہاں ایک کارکن کی حالت تشویشناک بتائی جاتی ہے۔
آگ لگنے کی اطلاع ملتے ہی فائر بریگیڈ کی کئی گاڑیوں نے بڑی محنت سے آگ پر قابو پالیا۔ اس واقعہ کے بعد بڑی تعداد میں لوگ موقع پر جمع ہو گئے اور متوفی کے اہل خانہ میں سے ایک کو نوکری اور مناسب معاوضہ دینے کا مطالبہ کر رہے ہیں۔اس واقعہ پر گہرے رنج وغم کا اظہار کرتے ہوئے وزیر اعلیٰ بھجن لال شرما نے کہا کہ جے پور کے قریب بسی میں واقع کیمیکل فیکٹری میں آگ لگنے سے شہریوں کی موت انتہائی افسوسناک ہے۔ انہوں نے سوشل میڈیا کے ذریعے کہا کہ متعلقہ حکام کو فوری طور پر موقع پر پہنچ کر راحت اور بچاؤ کارروائیاں تیز کرنے اور متاثرہ لوگوں کو ہر ممکن مدد فراہم کرنے کی ہدایت دی گئی ہے۔