ممبئی، 25 مئی (یواین آئی) حج 2024 کے لیے 378 خوش نصیب عازمینِ حج کا پہلا قافلہ سعودی ایئر لائنز کی پرواز سے ممبئی کے چھتر پتی شیواجی مہاراج بین الاقوامی ائیر پورٹ سے آج جدہ کے لیے علی الصبح روانہ ہوا، اس موقع پر منعقدہ ایک پُر وقار تقریب میں عازمینِ حج کو شایانِ شان انداز میں رخصت کرتے ہوئے وزارت اقلیتی امور حکومتِ ہند میں ڈائریکٹر اور حج کمیٹی آف انڈیا کے سی، ای، او ڈاکٹر لیاقت علی آفاقی، آئی آر ایس نے بتایا کہ آپ ایسے پہلے خوش نصیب حاجی ہیں جو جدہ سے میٹرو ٹرین کا خوبصورت اور آرام دہ سفر کرتے ہوئے شہر مقدس مکہ مکرمہ پہنچیں گے۔
ڈاکٹر آفاقی نے بتایا کہ حج 2024 کو سہولیات اور آسانیوں سے پُر بنانے کے لیے ہر سطح پر قبل از وقت کوشش کی گئی ہے۔ لیکن ہم سب ہمیشہ سے سُنتے اور پڑھتے آرہے ہیں کہ سفر حج مشکلات کا مجموعہ ہے تمام تر کوششوں کے باوجود کہیں نہ کہیں کمی رہ سکتی ہے، دقتیں پیش آسکتیں ہیں، ان کے حل اور سفر حج میں اور آسانی پیدا کرنے کے لیے وزارتِ اقلیتی امور حکومت ہند کی جانب سے تیار کیے گئے حج سویدھا ایپ کا باقاعدگی سے استعمال کریں۔ ڈاکٹر آفاقی نے بتایا کہ سیودھا ایپ میں لال بٹن کو دبا کر اپنی پریشانی بتائیں ہماری ٹیم بہت کم وقفے میں آپ کی مدد کے لیے پہنچ جائے گی۔ سی، ای، او حج کمیٹی آف انڈیا ڈاکٹر آفاقی نے مزید کہا کہ سب جانتے ہیں کہ سفر حج دیگر اسفار کی بنسبت مشکل سفر ہے یہاں کچھ جسمانی اور غذائی تکالیف برداشت کرنا ہی پڑتیں ہیں۔ ایسے مواقع پر جذباتی نہ ہوں بلکہ صبر و تحمل سے کام لیں۔ حج دوسرے ملک میں ہوتا ہے یہاں کے قوانین الگ ہیں، آپ یہاں اپنے ملک کے نمائندے ہیں۔ اپنے عمل سے ملک کے وقار کو بلند کیجئے چھوٹی چھوٹی باتوں کو نظر انداز کریں ، افواہوں اور جھوٹے پروپیگنڈے کا شکار نہ ہوں ۔ بعض افراد پرانے ویڈیو شیئر کرکے آپ کو گمراہ کرنے اور اصل مقصد سے ہٹانے کے کوشش کرسکتے ہیں۔ آپ صبر و تحمل کا مظاہرہ کریں۔
عازمین کو خطاب کرتے ہوئے ڈاکٹر آفاقی نے عازمین سے مزید اپیل کی دورانِ حج حکومتِ ہند اور مملکتِ سعودیہ عرب کے قوانین پر پورا عمل کریں۔ واضح رہے کہ امسال ممبئی امبارکیشن ہندوستان کا سب سے بڑا امبارکیشن پوائنٹ ہے ۔ یہاں سے سعودی ائیر لائنز کی 101 فلائٹس کے زریعے مختلف ریاستوں کے تقریباً 35000 ہزار ہندوستانی حجاج فریضہ حج کی ادائیگی کے لیے جدہ روانہ ہونگے۔ جلسہ کی نظامت شیخ محمد غوث،سپرینڈینٹ حج کمیٹی آف انڈیا نے کی۔ اس موقع پر ممبئی امبارکیشن پوئنٹ کے انچارج شیخ حیدر پاشا کے ساتھ حج کمیٹی کے ذمہ داران اور تمام متعلقہ ایجنسیز کے اعلیٰ آفسران موجود تھے۔
