وزیر خارجہ آج سعودی عرب جائیں گے

نئی دہلی(ایم این این) ہندوستانی وزیر خارجہ جناب ایس جے شنکر ہفتہ سے سعودی عرب کا دو روزہ دورہ کریں گے، جو ہندوستان کے وزیر خارجہ کے طور پر مملکت کا ان کا پہلا دورہ ہے۔ وزارت خارجہ امور نے ایک بیان میں کہا، وزیر خارجہ ڈاکٹر ایس جے شنکر، 10-12 ستمبر 2022 کو سعودی عرب کا سرکاری دورہ کریں گے۔ یہ ہندوستان کے وزیر خارجہ کے طور پر مملکت کا پہلا دورہ ہوگا۔ دورے کے دوران، وزیر خارجہ اپنے سعودی ہم منصب کے ساتھ ہند-سعودی عرب اسٹریٹجک پارٹنرشپ کونسل کے فریم ورک کے تحت قائم سیاسی، سیکورٹی، سماجی اور ثقافتی تعاون کی کمیٹی کی افتتاحی وزارتی میٹنگ کی شریک صدارت کریں گے۔ وہ سعودی شہزادہ فیصل بن فرحان السعود سے بھی ملاقات کریں گے۔دونوں وزراء پورے دو طرفہ تعلقات کا ایک جامع جائزہ لیں گے اور پی ایس ایس سیکمیٹی کے چار مشترکہ ورکنگ گروپس، یعنی سیاسی اور قونصلر؛ قانونی اور سلامتی؛ سماجی اور ثقافتی اور دفاعی تعاون پر مشترکہ کمیٹی کے تحت ہونے والی پیش رفت پر تبادلہ خیال کریں گے۔ ریلیز میں مزید کہا گیا کہ ان گروپوں اور سینئر عہدیداروں کی (سیکرٹری سطح پر) ملاقاتیں گزشتہ چند مہینوں میں ہوئی ہیں۔ دونوں فریقین اقوام متحدہ، گروپ آف ٹوئنٹی میں اپنے تعاون سمیت باہمی دلچسپی کے علاقائی اور بین الاقوامی امور پر بھی تبادلہ خیال کریں گے۔