مجیدیہ یونانی اسپتال کی طرف سے مفت طبی کیمپ کا انعقاد

نئی دہلی، 16نومبر(یو این آئی)یونانی طریقہ علاج کو عام لوگوں تک پہنچانے اور اس کی تاثیر سے واقف کرانے کے لئے جامعہ ہمدرد کے اسکول آف یونانی میڈیکل ایجوکیشن اینڈ ریسرچ کے شعبہ جراحی اورشعبہ عین اذن انف و حلق کی زیر نگرانی اور مجیدیہ یونانی ہاسپیٹل کے تعاون سے آ ج مجیدیہ اسپتال کے احاطے میں شیخ الجامعہ پروفیسرڈاکٹرایم افشارعالم کی زیر سرپرستی اور ڈین اسکول آف یونانی میڈیکل ایجوکیشن اینڈ ریسرچ پروفیسرڈاکٹر عاصم علی خان کی رہنمائی میں مفت میڈیکل ہیلتھ کیمپ کا انعقاد عمل میں آیا۔اس کیمپ میں شعبہ جراحی کے ڈاکٹر منہاج احمد ،شعبہ عین اذن انف و حلق کے ڈاکٹر زہرا زیدی، ڈاکٹر عبدالناصر اور مجیدیہ یونانی اسپتال کی مشہور ڈاکٹرشہلا نذیر اور ماہر اسنان(ماہرامراض دندان) ڈاکٹر سونیا راج نے علاج و معالجہ کا فریضہ انجام دیا۔
اس موقع پر مختلف و مشہور یونانی اور آیورویدک کمپنیوں نے مریضوں کو مفت دوائیں تقسیم کیں۔ 200سے زیادہ مریضوں نے اس میں حصہ لیا جن میں بلڈ پریشر، ذیابیطس شکری، ورم مفاصل ،جوڑوں کے درد، دمہ،بواسیر، قبض و اسہال، ورم کبد، گردے کی پتھری، آنکھوں سے پانی آنا، بینائی کا کمزور ہونا، کیٹیریکٹ و گلوکوما ، وجع الاذن ، ضعف سماعت و،پائیریاو دانتوں کے مریض پائے گئے۔اس کیمپ میں مریضوں کی جانچ جیسے ٹیمپریچر ، بلڈپریشر، وزن کیا گیا نیز مفت جانچ جیسے بلڈ شوگر ٹیسٹ،بی ایم ڈی، بی ایم آر، ویژن ٹیسٹ اور اسنان سے متعلق بھی بہت سی مفت جانچ کی گئی۔اس موقع پراسکول کے دیگر اساتذہ ، اطباءو طلبا کے علاوہ اسپتال کے ڈاکٹرس،اسٹاف نرس،بی یوایم ایس انٹرن و دیگر عملے کے لوگ موجود تھے۔