نئی دہلی؍سرینگر(ہندوستان ایکسپریس نیوز بیورو،ایجنسیاں)جموں و کشمیر میں اسمبلی انتخاب کب کرایا جائے گا، اس سلسلے میں ابھی تک کچھ بھی صاف نہیں ہوا ہے۔ لیکن سبھی پارٹیوں نے خود کو مضبوط بنانے کے لیے سرگرمیاں شروع کر دی ہیں۔ اس ضمن میں کانگریس نے آج کچھ اہم فیصلے کیے جس میں جموں و کشمیر کانگریس صدر کی تقرری کے ساتھ ہی غلام نبی آزاد کو پارٹی کی انتخابی کمیٹی کی سربراہی بھی شامل ہے،لیکن کانگریس کا یہ فیصلہ ’سرمنڈاتے ہی اولے پڑے‘ کے مصداق کانگریس کی اندرونی پریشانی کا سبب بن گیا ہے،کیونکہ میڈیا میں یہ خبرآرہی ہے کہ کانگریس کی انتخابی کمیٹی کی سربراہی سے غلام نبی آزاد نے استعفیٰ دے دیا ہے۔
کانگریس کشمیر یونٹ کی تشکیل نو کرتے ہوئے غلام نبی آزاد کو جموں و کشمیرکی انتخابی مہم سے متعلق کمیٹی کا سربراہ بنا کا فیصلہ کیا تھا۔ابھی یہ واضح نہیں ہے کہ پارٹی اعلیٰ کمان نے انہیں یہ ذمہ داری ان سے بغیرپوچھے دی تھی، یااس ضمن میں ان کی کوئی رائے لی گئی تھی۔ آپ کو یہ بھی بتادیں کہ غلام نبی آزادی کے قریبی تصور کیے جانے والے وقار رسول وانی کو جموں و کشمیر کانگریس کا نیا صدر مقرر کیا گیا ۔اس فیصلہ سے بھی یہی ظاہر ہورہاتھا کہ مرکز کے زیر انتظام اس خطہ میں کانگریس کو مضبوط بنانے کی ذمہ داری غلام نبی آزادی کو سونپی گئی ہے، لیکن اس فیصلے کچھ ہی گھنٹوں بعد یہ خبرآ گئی کہ غلام نبی آزاد نے استعفیٰ دے دیا ہے۔
قابل ذکر ہے کہ جموں و کشمیر کانگریس صدر غلام احمد میر نے گزشتہ دنوں استعفیٰ دے دیا تھا جسے پارٹی نے منظور کرتے ہوئے ریاستی یونٹ کی نوتشکیل کا فیصلہ کیا۔ رمن بھلا کو پارٹی کا کارگزار صدر بنایا گیا ۔
کانگریس نے انتخابی کمیٹی کی کمان سابق وزیر اعلیٰ غلام نبی آزاد کے سپرد کرنے کے علاوہ سیاسی امورات کمیٹی کی کمان سابق ممبر پارلیمنٹ طارق حمید قرہ کو سونپی تھی۔ یہ پیشرفت کانگریس صدر کی جانب سے جموں و کشمیر پردیش کانگریس کمیٹی کے صدر کے عہدے سے غلام احمد میر کا استعفیٰ قبول کرنے کے بعد سامنے آئی تھی۔ پارٹی کے مرکزی جنرل سیکریٹری کے سی وینو گوپال کے مطابق’’ کل ہندکانگریس صدر نے جموں کشمیر پردیش کانگریس کمیٹی کے صدر غلام احمد میر کا استعفیٰ قبول کیا ہے‘‘۔
باخبر ذرائع کا یہ بھی کہنا ہے کہ کانگریس صدر نے پارٹی کے صدر،کارگزار صدر، کی تقرری عمل میں لانے کے علاوہ جموں کشمیر میں سیاسی امور کی کمیٹی،کارڈی نیشن کمیٹی،منشور کمیٹی،انتخابی مہم کمیٹی،پبلسٹی و اشتہاری کمیٹی ضوابطی کمیٹی کے قیام کو بھی منظوری دی تھی ۔ انتخابی مہم کمیٹی میں سابق وزیر اعلیٰ غلام نبی آزاد کو چیئرمین اور سابق ممبر پارلیمنٹ طارق حمید قرہ کو نائب چیئرمین نامزد کیا گیا۔اس کمیٹی میں سابق وزیر جی ایم سروری کنونیئر ہونگے جبکہ غلام احمد میر،سابق نائب وزیر اعلیٰ تارا چند، ٹھاکر بھلوان سنگھ،ٹی ایس باجوا،شبیر احمد خان،نیرج کندن،عبدالمجید وانی اور فیروز احمد خان ممبران ہونگے۔ صدر اور کارگزار صدر مستقل مدعوین میں شامل ہونگے۔
کانگریس کے مرکزی جنرل سیکریٹری کی جانب سے جاری فہرست کے مطابق سیاسی امور کی کمیٹی میں غلام نبی آزاد کے علاوہ طارق حمید قرہ چیئرمین ہونگے جبکہ غلام احمد میر،پروفیسر سیف الدین سوز،پیرزادہ محمد سعید، تاج محی الدین،تارا چند،مولا رام اور کھیم لتا وکھلوممبران ہونگے جبکہ کل ہند کانگریس کے انچارج،جموں کشمیر کانگریس کے صدر اور کارگزار صدر بھی مستقل مدعوین میں شامل ہونگے۔ کے سی وینو گوپال کے مطابق کارڈی نیشن کمیٹی میں غلام احمد میر چیئرمین،ڈاکٹر منوہر لال،نائب چیئرمین جبکہ یوگیش سہانی کنونیئر ہونگے۔
اس کے علاوہ تال میل کمیٹی مین جگل کشور شرما، بشیر احمد ماگرے، رمن متو،اندو پوار،محمد امین بٹ(وازی گنڈ) حاجی عبدالرشید ڈار،عبدالمجید وانی اور شہنواز چودھری ممبران ہونگے۔منشور کمیٹی کی کمان کانگریس کے صابق صدر پروفیسر سیف الدین سوز کو سونپی گئی جبکہ ایم کے بھردواج نائب چیئرمین اور رویندر شرما کنوینئر ہونگے۔منشور کمیٹی کے ارکان میں نریش گپتا،غلام نبی مونگا،زاہدہ خان،شمیمہ رینہ،جہانگیر ،منظور احمد گنائی،جہاں زیب سریوال،افتخار احمد اور وکرم بھنڈاری شامل ہونگے۔کانگریس جنرل سیکریٹری کے مطابق پبلسٹی اینڈ پبلی کیشنز کمیٹی کی کمان مولارام کو سونپی گئی جبکہ ایس ایس چنی وائس چیئرمین اور ڈاکٹر رشید چودھری کنونیئر ہونگے۔
اس کمیٹی میں اشوک شرما،ونود مشرا،بشیر احمد خان،عمران ظفر،ستیش شرما،ادھے بانو چپ شامل ہونگے۔کانگریس کی ضوابطی کمیٹی میں تاج محی الدین کو چیئرمین جبکہ کے کے پنگوترا کو وائس چیئرمین اور شاہ محمود چودھری کو کنونیئر نامزد کیا گیا۔ضوابطی کمیٹی میںٹھاکر بلویو سنگھ،کانتا بھان،پرنو سگہوترا اور عبدالغنی خان شامل ہونگے۔ الیکشن کمیٹی میں پردیش کانگریس کمیٹی کے صدر کو چیئرمین نامزد کیا گیا جبکہ کارگزار صدر،غلام احمد میر،تارا چند،تاج محی الدین،جی ایم سروری،ملا رام،حاجی عبدالرشید، شبیر احمد خان،رویندر شرما، تھاکر بلوبیر سنگھ،گلزار احمد وانی،انور بٹ،عبدالمجید وانی،چودھری محمد اکرم، یوگیش سہانی،ایس ایچ چنی،منموہن سنگھ،چودھری شاہنواز اور ایڈوکیٹ دیپیکا پوشکر اس کے ممبر ہونگے۔
ذہن نشیں رہے کہ غلام نبی آزاد پارٹی اعلیٰ کمان سے ایک عرصہ سے ناراض بتائے جاتے ہیں۔ دراصل غلام نبی آزاد پارٹی کے نا مطمئن گروپ سے وابستہ ہیں،جس گروپ کے ذریعہ ماضی میں پارٹی اعلیٰ کمان کو شدید تنقید کا نشانہ بنایاجاتارہاہے۔
