اپنی ناکامیوں کو چھپانے کیلئے غلط کارروائی کررہی ہے ہریانہ سرکار:آفتاب احمد

نوح؍میوات:نوح سے رکن اسمبلی اورہریانہ اسمبلی میں حذب اختلاف کے ڈپٹی لیڈر چودھری آفتاب احمد سے نلہڑ گائوں کے تقریباً ایک درجن لوگوں نے گاؤں کے سرپنچ کی قیادت میں ملاقات کرکے بتایا ہے، کہ مقامی انتظامیہ اور محکمہ جنگلات نے پرانی تاریخوں میں نوٹس دے کر آج ہی ان کے گھروں اور دکانوں کو بلڈوزر چلاکر زمین بوس کردیا ہے،یہ نوٹس ایک مہینہ پرانی تاریخوں کے ہیں،جو انھیں مکانوں اور دکانوں کو گرانے کے دن ہی دئے گئے ہیں،بتایا جا رہا ہے کہ نوح شہر اور آس پاس کے علاقوں میں مسلمانوں کے مکانوں اور دکانوں کو زمین بوس کیا جا رہا ہے،ان میں ایسے لوگوں کی جھونپڑیاں بھی شامل ہیں جو انتہائی غریب اور مفلس ہیںلیکن سرکار کے بلڈوزرکا بے رحم پنجہ انھیں منہدم کرنے سے باز نہیں آرہا ہے،یہ بہت ہی دکھ اور افسوس کا مرکزہے،
نوح سے رکن اسمبلی چودھری آفتاب احمد نے نوح ضلع کے ڈپٹی کمشنر اور پولس کپتان سے مل کر اس بے جا اور غیر قانونی کارروائی کو فوری روکنے کی مانگ کی ہے ،لیکن ڈپٹی کمشنر اور پولس کپتان نے ان کو اطمینان بخش جواب نہیں دیا ہے،اس دوران نامہ نگاروں سے بات کرتے ہوئے چودھری آفتاب احمد نے صاف طور پر کہا ،کہ ریاستی حکومت اپنی ناکامیوں کو چھپانے کے لئے ایسی غلط کارروائیاں کر رہی ہے،انھوں نے کہا ہے کہ غریب لوگوں کے سروں سے چھت اجاڑنے کا کام بی جے پی اور جے جے پی حکومت میں ہو رہا ہے،پہلے بے قصور لوگوں کی گرفتاریاں شروع کی گئیں،اور اب غریب لوگوں کے گھروں اور دکانوں کو گرانے کا عمل غیر قانونی اور آئین کے خلاف ہے،ہم اس کی سختی سے مخالفت کرتے ہیں اور انصاف کے لئے قانونی لڑائی لڑیں گے۔