کرناٹک کے بیدر سے تعلق رکھنے والے ممتاز آرٹسٹ نے پدم شری ایوارڈ حاصل کرنے کے بعد وزیراعظم کی جم کر تعریف کی
نئی دہلی:کرناٹک کے بیدر سے تعلق رکھنے والے ممتاز آرٹسٹ و شلپ گرو شاہ رشید احمد قادری نےپدم شری ایوارڈ حاصل کرنے کے بعدوزیراعظم نریندرمودی کا شکریہ ادا کیا۔ وزیراعظم سے ملاقات کے دوران جناب قادری اتنے پرجوش نظر آئے کہ انہوں نے برملا وزیراعظم سے کہا کہ’کانگریس کے زمانے میں اس ایوارڈ کو پانے کیلئے میں نے برسوں کوشش کی لیکن مجھے یہ ایوارڈ نہیں مل سکا۔ جب مرکز میں بھارتیہ جنتا پارٹی اقتدار میں آئی تومجھے یہ گمان ہوگیا کہ اب مجھےپدم ایوارڈ نہیں ملے گا، کیونکہ ہمارے لاشعور میں یہ بات بیٹھی ہوئی ہے کہ بی جے پی کبھی بھی مسلمانوں کو کچھ نہیں دیتی ہے، لیکن وزیراعظم مودی نے مجھے اس ایوارڈ کیلئے منتخب کرکےمیرے خدشات کو غلط ثابت کردیا ۔’
جناب قادری کی باتیں سن کر وزیراعظم بے ساختہ ہنسنے لگے اور انہوں نے ان کے شکریہ کے جواب میں اپنے طور سے شکریہ ادا کیا۔
واضح رہے کہ صدر جمہوریہ ہند محترمہ دروپدی مرمو نے اس سال یوم جمہوریہ کے موقع پر 106 پدم ایوارڈز دئے جانے کو منظوری دی تھی ۔ بدھ کے روز53 شخصیات کوان اعلی ترین اعزازات سے نوازا گیا ، جن میں تین پدم ویبھوشن، پانچ پدم بھوشن اور 45 پدم شری شامل رہے ۔ دیگر معزز شخصیات کو 22 مارچ کو پدم ایوارڈ زدئے گئے تھے ۔
