‘انوسٹرس سمٹ-بہار بزنس کنیکٹ 2023’ کے افتتاحی سیشن سے خطاب کرتے ہوئے وزیر صنعت نے کہی یہ بات
پٹنہ(یو این آئی) بہار کے وزیر صنعت سمیر کمار مہاسیٹھ نے آج اعلان کیا کہ ریاستی حکومت اس بات کو یقینی بنانے کے لیے ہر ممکن اقدامات کر رہی ہے کہ بہار آئندہ پانچ سالوں میں ملک کی اولین پانچ صنعتی ریاستوں کے زمرے میں پہنچ جائے۔ بدھ کو یہاں ‘انوسٹرس سمٹ-بہار بزنس کنیکٹ 2023’ کے افتتاحی سیشن سے خطاب کرتے ہوئے مسٹر مہاسیٹھ نے کہا کہ وزیر اعلیٰ نتیش کمار کی قابل قیادت میں ریاستی حکومت نے بہار کی صنعت کاری کی رفتار کو تیز کرنے کے لیے بہت سے ضروری اقدامات کیے ہیں۔ انہوں نے کہا کہ صنعت کاری کی راہ میں حائل تمام رکاوٹوں کو دور کرنے کے لیے صنعتی پالیسی میں تبدیلیاں کی گئی ہیں۔
وزیر صنعت نے کہا، "ہم نے اس بات کو یقینی بنانے کا ہدف مقرر کیا ہے کہ بہار آئندہ تین سالوں میں ملک کی اولین دس صنعتی ریاستوں میں اور آئندہ پانچ سالوں میں اولین پانچ صنعتی ریاستوں میں شامل ہوسکے۔
بہار نے پنجاب، مہاراشٹر اور گجرات کو ایک ترقی یافتہ اور خوشحال ریاست بنانے میں نمایاں کردار ادا کیا ہے۔انہوں نے ان لوگوں سے جن کا بہار سے تعلق ہے یا جو بہار سے کسی بھی طرح سے جڑے نہیں ہیں ان سے بھی اس ریاست میں ایک بہت بڑا صنعتی نیٹ ورک بنانے میں سرمایہ کاری کرنے کے لئے آگے آنے کی اپیل کی اور کہا کہ اس سے روزگار کے کافی مواقع پیدا ہوں گے۔
مسٹر مہاسیٹھ نے کہا کہ بہار میں معیاری سڑکیں، بجلی کی دستیابی اور پانی کے وسیع وسائل کے ساتھ اچھا رابطہ ہے۔ انہوں نے کہا کہ پہلے سرمایہ کاروں کو صنعتیں لگانے کے لیے زمین فراہم کرنے میں ایک سال لگ جاتا تھا لیکن اب ریاستی حکومت صرف ایک ہفتے میں زمین فراہم کر رہی ہے۔
اس موقع پر چمڑے اور ٹیکسٹائل کے شعبے میں مختلف صنعتی گھرانوں کے ساتھ 468.50 کروڑ روپے کی مفاہمت کی یادداشت پر دستخط کیے گئے۔ اس مفاہمت نامے پر دستخط کرنے کے موقع پر وزیر صنعت مسٹر مہاسیٹھ اور ریاستی حکومت کے سینئر افسران موجود تھے۔
اس موقع پر جن سرکردہ صنعت کاروں نے اپنے خیالات کا اظہار کیا اور سرمایہ کاری کی پیشکش کی ان میں مونٹے کارلو کے چیئرمین کم مینیجنگ ڈائریکٹر کمل اوسوال، ہائی اسپرٹ کمرشل وینچر پرائیویٹ لمیٹڈ کے منیجنگ ڈائریکٹر تشار جین، ساوی لیدرز کے وجے جھا اور ویتنام ایمبیسی کے بل ٹرونگ تھواونگ شامل تھے۔پروگرام کا پہلا سیشن ٹیکسٹائل اور چمڑے کے شعبوں کے لیے مختص تھا۔
