سری نگر،14دسمبر(یواین آئی) وادی کشمیر میں گزشتہ چند روز سے جاری خشک موسم کے بیچ شبانہ درجہ حرارت مسلسل نقطہ انجماد سے نیچے درج ہونے کے باعث جہاں سردی کی شدت میں روز افزوں ہورہے اضافے نے لوگوں کا جینا دو بھر کردیا ہے وہیں جمعرات کی صبح شہرہ آفاق جھیل ڈل کے کنارے بھی منجمد ہوگئے تھے۔
اطلاعات کے مطابق وادی میں شبانہ درجہ حرارت مسلسل نقطہ انجماد سے نیچے درج ہو رہا ہے جس کی وجہ سے سردی کی شدت میں روز افزوں اضافہ ہو رہا ہے اور جمعرات کی صبح شہرہ آفاق جھیل ڈل کے کنارے منجمد ہوئے تھے۔
ڈل کے ایک رہائشی نے کہا کہ جمعرات کی صبح جھیل ڈل کے کنارے بھی منجمد ہوئے تھے اور سردی کی شدت کی وجہ سے لوگ کانگڑیوں کے بغیر گھروں سے باہر نکلنے کی جرات نہیں کرپا رہے تھے۔انہوں نے کہا: امسال میں نے دیکھا کہ چلہ کلان شروع ہونے سے پہلے ہی ڈل جھیل کے کنارے شدید سردی کے چلتے منجمد ہوئے اور سردی کی شدت اس قدر ہے کہ کانگڑیوں کے بغیر لوگ گھروں سے باہر قدم رکھنے کی جرات ہی نہیں کرپارہے ہیں۔ایک اور شہری نے کہا کہ موجودہ موسمی حالات کو چلہ کلان کے بیچوں بیچ محسوس کیا جاتا تھا۔
غلام محمد نامی ادھیڑ عمر کے ایک شہری نے یو این آئی اردو کو بتایا کہ امسال موسم سرما نے روز اول سے ہی اپنے تیکھے تیور دکھا کر لوگوں کو پریشان کررکھا ہے۔ انہوں نے کہا کہ ابھی چلہ کلان کی آمد میں ایک ہفتہ باقی ہیں اب چلہ کلان کے دوران سردی کیسے تیور دکھائے گی اس پر کچھ کہنا قبل از وقت ہی ہوگا لیکن آثار و قرائن کو دیکھ کر ایسا لگتا ہے کہ خیر نہیں ہوگی،
دریں اثناء سری نگر میونسپل کارپویشن (ایس ایم سی) کمشنر اطہر عامر خان کا کہنا ہے کہ سری نگر میں برف باری کی صورت میں سڑکوں سے برف ہٹانے کے لئے تمام تر مشینری اور افرادی قوت کو پوری طرح سے تیار رکھا گیا ہے۔انہوں نے کہا کہ شہر میں میونسپل سطح پر ایک کنٹرول روم قائم کیا گیا ہے اور شہر کو چار زونوں میں تقسیم کیا گیا ہے۔موصوف کمشنر نے ان باتوں کا اظہار جمعرات کو یہاں نامہ نگاروں کے ساتھ بات کرنے کے دوران کیا۔انہوں نے کہا: ‘سڑکوں سے برف ہٹانے کے لئے مشینری اور افرادی قوت کو تیار رکھا گیا ہے’۔ان کا کہنا ہے: ‘پورے شہر میں میونسپل سطح پر ایک کنٹرول روم قائم کیا گیا ہے شہر کو چار زونوں میں تقسیم کیا گیا ہے اور ہر زون میں ایک زونل کنٹرول روم قائم کیا گیا ہے’۔
مسٹر خان نے کہا کہ برف ہٹانے کے لئے ہمارے پاس 50 سے 55 مشینیں ہیں جن میں سے 45 نئی ہیں جن کو تیار رکھا گیا ہے۔انہوں نے کہا کہ پرانی مشینوں کوضروری مرمت کرکے تیار رکھا گیا ہے۔ان کا کہنا تھا: ‘ڈرائیوروں کو بھی ڈبل شفٹ میں کام کرنے کے لئے ہر طرح سے تیار رکھا گیا ہے اور سڑکوں کو نقصان نہ پہنچنے کو یقینی بنانے کے لئے مخصوص اقدام کئے جا رہے ہیں’۔
موصوف کمشنر نے کہا کہ قریب 28 سو افراد کو تیار رکھا گیا ہے جن کو تمام ضروری ساز و سامان فراہم کیا گیا ہے۔انہوں نے کہا کہ برف ہٹانے کے لئے جو بھی ضروی ساز و سامان ہے اس کو حاصل کیا گیا ہے۔ان کا کہنا تھا کہ کئی علاقوں میں پانی کی نکاسی کے لئے بھی مشینوں کا بند وبست کیا گیا ہے اور اس کے لئے بھی ضروری مشینوں کو تیار رکھا گیا ہے۔انہوں نے کہا کہ اس کے لئے 125 موبائل ڈی واٹرنگ یونٹوں کو تیار رکھا گیا ہے۔مسٹر اطہر عامر نے لوگوں سے اپیل کی کہ وہ سڑکوں اور گلی کوچوں میں اپنی گاڑیوں کو پارک کرنے سے پر ہیز کریں تاکہ ہمارے عملے کو وقت ضرورت دقتوں کا سامنا نہ کرنا پڑے۔
