ہماچل پردیش میں لینڈ سلائیڈنگ ، ایک کنبہ کے 5 افراد سمیت 7 جاں بحق

شملہ، 26 ستمبر (یو این آئی) ہماچل پردیش کے ضلع سرمور میں شدید بارش سے تباہی ہوئی ہے، جہاں گزشتہ 24 گھنٹے کے دوران بارش کے باعث مٹی کے تودے گرنے سے ایک ہی خاندان کے پانچ افراد سمیت سات افراد جاں بحق ہو گئے۔
سرمور کے شیلئی ودھان سبھا حلقہ میں، ایک ہی کنبہ کے پانچ لوگوں کی اس وقت موت ہو گئی جب ان کے مکان پر مٹی کے تودے گرے۔ بدو صاحب میں کرنٹ لگنے سے ایک مزدور کی موت ہوگئی جبکہ نورادھار میں مٹی کا تودہ گرنے سے ایک شخص جاں بحق ہوگیا۔
شیلئی کے سب ڈویژن رونہاٹ میں شدید بارش سے تباہی ہوئی ہے ،جہاں ایک مکان مٹی کے تودے کی زد میں آگیا جس کے نتیجے میں ایک ہی خاندان کے 5 کی موت ہوگئی جبکہ ایک شخص زخمی ہوگیا۔ مقامی لوگ اور انتظامیہ کی ٹیم موقع پر پہنچ گئی اور راحت رسانی کا کام میں مصروف ہوئے۔
معلومات کے مطابق حادثہ دیر رات پیش آیا۔ جب گاؤں کی پنچایت سڑک پر کھجواڑی گاؤں کے نزدیک ایک کنبہ کے افراد گھر میں سو رہے تھے، اور موسلا دھار بارش ہو رہی تھی۔ اچانک مکان کی پچھلی جانب پہاڑی پر مٹی کا تودہ گرا اور مکان اس کی لپیٹ میں آگیا، جس میں پورا خاندان دب گیا۔
اب تک موصولہ معلومات کے مطابق، خاندان کے سرپرست پردیپ کو ملبے سے بحفاظت نکال لیا گیا ہے، جب کہ پردیپ کی بیوی اور اس کے تین بچوں اور ایک بھتیجی سمیت چار افراد کی موت ہو گئی ہے۔ مرنے والوں کی شناخت ممتا (27)، ایشیتا (8)، علیشا (6)، ایرنگ (2) اور اکانشیکا (7) بیٹی تلسی رام گاؤں کھڈچ کے طور پر ہوئی ہے۔ پردیپ سنگھ شدید زخمی ہے۔