مدھیہ پردیش اسمبلی کے اجلاس کا آغاز آج

بھوپال، 17 دسمبر (یواین آئی) مدھیہ پردیش کی نو تشکیل شدہ سولہویں اسمبلی کا پہلا اجلاس پیر کو شروع ہوگا، جس میں بنیادی طور پر نو منتخب ایم ایل ایز کو حلف دلایا جائے گا اور اسپیکر کا انتخاب کیا جائے گا۔سرکاری ذرائع کے مطابق نئے ایم ایل اے اس چار روزہ اجلاس کے پہلے دو دنوں یعنی پیر اور منگل کو حلف لیں گے۔ اجلاس کے تیسرے دن 20 دسمبر کو اسمبلی کے اسپیکر کا انتخاب ہوگا اور اس کے بعد گورنر خطاب کریں گے۔ذرائع نے بتایا کہ گورنر کے خطاب پر شکریہ کا ووٹ بدھ کو ہی پیش کیا جائے گا اور اگلے دن جمعرات کو سیشن کے آخری دن اظہار تشکر پر بحث کی جائے گی۔ اسمبلی کے اسپیکر کے انتخاب تک ایوان کا نظم و نسق پروٹیم اسپیکر گوپال بھارگوا کریں گے۔
اسمبلی کے پرنسپل سکریٹری اے پی سنگھ نے اسمبلی اجلاس سے قبل تیاریوں کا جائزہ لیا اور حفاظتی انتظامات کو مزید سخت کرنے کی ہدایات دیں۔ انہوں نے خاص طور پر کہا کہ سیکورٹی کے معاملے میں کسی قسم کی کوتاہی نہیں ہونی چاہیے۔مدھیہ پردیش میں حال ہی میں ختم ہونے والے اسمبلی انتخابات میں کل 230 سیٹوں میں سے بھارتیہ جنتا پارٹی (بی جے پی) نے 163 پر کامیابی حاصل کی، جب کہ کانگریس کو 66 پر مطمئن ہونا پڑا۔ ایک اور ایم ایل اے بھارت آدیواسی پارٹی کے کملیشور ڈوڈیار ہیں۔