بھوپال (یو این آئی) وزیر اعظم نریندر مودی کی موجودگی میں آج گورنر منگو بھائی پٹیل نے ڈاکٹر موہن یادو کو مدھیہ پردیش کے وزیر اعلیٰ کے عہدے کا حلف دلایا۔ مسٹر یادو ریاست کے بیسویں وزیر اعلیٰ ہیں۔ اس کے علاوہ گورنر نے مسٹرجگدیش دیوڑا اور مسٹرراجندر شکلا کو نائب وزیر اعلیٰ کے عہدے کا حلف دلایا۔
مقامی موتی لال نہرو اسٹیڈیم میں منعقدہ ایک شاندار اور باوقار تقریب میں وزیر اعلیٰ اور دونوں نائب وزرائے اعلیٰ نے عہدوں اور رازداری کا حلف لیا۔ مسٹر مودی کے علاوہ مرکزی وزیر داخلہ امت شاہ، بھارتیہ جنتا پارٹی (بی جے پی) کے صدر جے پی نڈا، دیگر سینئر مرکزی وزراء، بی جے پی کے دیگر سینئر لیڈر اور کئی ریاستوں کے وزرائے اعلیٰ بھی اس تقریب میں موجود تھے۔
اس تقریب میں ریاستی بی جے پی صدر وشنودت شرما، سابق وزیر اعلی شیوراج سنگھ چوہان، سابق مرکزی وزیر نریندر سنگھ تومر اور دیگر معززین بھی موجود تھے۔ تقریب کی نظامت چیف سیکرٹری محترمہ ویرا رانا نے کی۔
تقریب حلف برداری کے لیے تیار کیے گئے اسٹیج کے قریب ایک اور عظیم الشان اسٹیج تیار کیا گیا، جس پر مختلف سادھو سنت موجود تھے۔ سنتوں نے شنکھ ناد بھی کیا۔مدھیہ پردیش کے سولہویں اسمبلی انتخابات میں حکمران جماعت بی جے پی نے کل 230 میں سے 163 سیٹیں جیت کر اپنی حکومت برقرار رکھی ہے۔ حال ہی میں، بی جے پی لیجسلیچر پارٹی کی میٹنگ میں اجین جنوبی اسمبلی حلقہ کی نمائندگی کرنے والے ڈاکٹر موہن یادوکو لیڈر منتخب کیا گیاتھا۔
آپ کو بتادیں کہ مدھیہ پردیش میں آج وزیر اعلیٰ کے طور پر حلف لینے والے ڈاکٹر موہن یادو راشٹریہ سویم سیوک سنگھ کی پسند مانے جارہے ہیں اور ’’لو پروفائل‘‘ میں رہ کر کام کرنا ان کا خاصہ ہے۔شری مہاکال کے شہر اجین میں 25 مارچ 1965 کو پیدا ہوئے مسٹر یادو اب تک شیوراج سنگھ چوہان کی کابینہ میں اعلیٰ تعلیم کے وزیر کی ذمہ داری نبھا رہے تھے۔ اس بار بھی وہ مسلسل تیسری بار اجین جنوبی اسمبلی حلقہ سے منتخب ہوئے ہیں۔ وکرم یونیورسٹی، اجین سے تعلیم حاصل کرنے والے 58 سالہ مسٹر یادو نے بی ایس سی، ایل ایل بی، سیاسیات میں ایم اے کے علاوہ ایم بی اے تک تعلیم حاصل کی ہے۔ انہوں نے پی ایچ ڈی بھی کی ہے۔ڈاکٹر یادو کے والد کا نام مسٹر پونم چند یادو اور ان کی اہلیہ محترمہ سیما یادو ہیں۔ ان کے دو بیٹے اور ایک بیٹی ہے۔ ان کی سیاحت، ثقافت، تاریخ، سائنس اور کھیلوں میں بڑی دلچسپی ہے۔
ڈاکٹر یادو کا سیاسی زندگی میں داخلہ 1982 میں اجین کے مادھو سائنس کالج میں طلبہ یونین کے انتخابات کے ساتھ ہوا، جب وہ جوائنٹ سکریٹری منتخب ہوئے۔ اس کے بعد وہ 1984 میں اکھل بھارتیہ ودیارتھی پریشد میں شامل ہوئے اور کئی اہم ذمہ داریاں نبھائیں۔ اس کے بعد وہ بی جے پی میں بھی سرگرم ہوگئے اور 2000 سے 2003 تک اجین نگر ضلع جنرل سکریٹری بھی رہے۔سال 2013 میں وہ مدھیہ پردیش اسٹیٹ ٹورازم ڈیولپمنٹ کارپوریشن کے چیئرمین بنے اور انہیں کابینہ وزیر کا درجہ دیا گیا۔ وہ سال 2013 میں اجین جنوبی اسمبلی حلقہ سے ایم ایل اے بنے اور تب سے اس علاقے کی نمائندگی کررہے ہیں۔ وہ شیوراج سنگھ چوہان کی حکومت میں 2 جولائی 2020 کو ریاست کے اعلیٰ تعلیم کے وزیر بنے اور اب تک یہ ذمہ داری نبھا رہے ہیں۔
