مدھیہ پردیش میں انتخابی میٹنگ سےکانگریس جنرل سکریٹری کا خطاب
ستنا(یو این آئی) کانگریس جنرل سکریٹری پرینکا گاندھی وڈرا نے آج اپنی دادی سابق وزیر اعظم محترمہ اندرا گاندھی اور اپنے والد راجیو گاندھی کو یاد کیا جو وزیر اعظم تھے اور کہا کہ ملک اور عوام کی خدمت ان کے لیے سب سے اہم تھے اور دونوں نے ملک کے لیے اپنا خون بھی بہایا محترمہ وڈرا نے اتر پردیش کی سرحد سے متصل مدھیہ پردیش کے وِندھیا علاقہ کے چترکوٹ اور ستنا ضلع میں ریاستی اسمبلی انتخابات کے پیش نظر پارٹی امیدوار کے حق میں ایک انتخابی میٹنگ سے خطاب کیا۔ انہوں نے بھگوان رام اور بابائے قوم مہاتما گاندھی کا بھی ذکر کیا اور کہا کہ یہ ملک بھگوان رام کی روایات پر چلنے والا ہے اور مہاتما گاندھی نے رام کے نظریات کو اپنایا تھا۔ یہی وجہ ہے کہ جب مہاتما گاندھی کو گولی ماری گئی تو ان کے منہ سے ’’ہے رام‘‘ نکلا اور کانگریس پارٹی مہاتما گاندھی کی روایت پر چل رہی ہے۔ انہوں نے کہا کہ اسی طرح ان کے نانا اور والد نے بھی ملک کے لیے خون بہایا۔ وہ ہمیشہ اس ملک کے عوام کے سامنے جوابدہ رہے، جب کہ آج کی بی جے پی قیادت ایسی نہیں ہے۔
کانگریس جنرل سکریٹری نے مرکز اور ریاست میں حکمراں جماعت بھارتیہ جنتا پارٹی (بی جے پی) کی اعلیٰ قیادت پر شدید حملہ کرتے ہوئے کہا کہ جو لوگ اپنے آپ کو ’’فقیر‘‘ اور ’’ماما‘‘ کہتے ہیں وہ بڑی بڑی باتیں کرتے ہیں، لیکن غریبوں کی پروا نہیں کرتے۔ کسانوں، خواتین اور بے روزگار نوجوانوں کے لیے انہوں نے کچھ نہ کیا۔ انہوں نے وزیر اعظم نریندر مودی اور شیوراج سنگھ چوہان کا نام لیے بغیر کہا کہ جس لیڈر کو فقیر کہا جاتا ہے اس نے اتر پردیش کے گنے کے کسانوں کو 15 ہزار کروڑ روپے کی ریلیف نہیں دی اور حکومت سے اپنے لیے 16 ہزار کروڑ روپے کے دو طیارے خریدے۔ اسی طرح جب ریاست میں کھاد، بیج اور دیگر مسائل سے متعلق مسائل پیدا ہوتے ہیں تو ریاست کا سربراہ کہتا ہے، ’’ماما ہے نا‘‘، لیکن وہ کچھ نہیں کرتے۔ انہوں نے طنزیہ انداز میں کہا کہ ماما بھی ’’کنس‘‘ تھے۔
محترمہ وڈرا نے الزام لگایا کہ ملک کی موجودہ حکومت کے سربراہ اپنے دوستوں "امبانی اور اڈانی” کو سرکاری اثاثے بیچ رہے ہیں۔ یہ جائیدادیں پچھلی حکومتوں نے بہت محنت کے بعد بنائی تھیں۔ یہ لوگ کسانوں، غریبوں، خواتین اور نوجوانوں کے مفاد میں کام نہیں کر رہے ہیں۔ انہوں نے کہا کہ ان تمام چیزوں کو دیکھتے ہوئے عوام کو ان سب کو سبق سکھانا چاہیے۔ یہ کام انتخابات میں ووٹنگ کے ذریعے ہو سکتا ہے۔ جمہوری نظام میں یہ اختیار عوام کو دیا گیا ہے۔
