جموں،یکم مئی(یو این آئی)پیپلز ڈیموکریٹک پارٹی (پی ڈی پی ) کی صدر محبوبہ مفتی نے بدھ کے روز کہاکہ بی جے پی عوام کا کنٹرول اور اعتماد کھو چکی ہے۔انہوں نے کہاکہ بی جے پی کے جھوٹے وعدوں سے لوگ تنگ آچکے ہیں اس لئے پورے ملک میں تبدیلی ناگزیر بن گئی ہے ۔ان کا مزید کہنا تھا کہ نیشنل کانفرنس کو الیکشن کے دوران پتہ چلے گا کہ پی ڈی پی کتنی مضبوط ہے۔ان باتوں کا اظہار محبوبہ مفتی نے راجوری میں نامہ نگاروں سے بات چیت کے دوران کیا۔انہوں نے کہاکہ سوچی سمجھی سازش کے تحت راجوری ، اننت ناگ پارلیمانی نشست پر الیکشن کو موخر کیا گیا ۔
انہوں نے کہاکہ بی جے پی پہلے ہی شکست کھا چکی ہے کیونکہ انتخابات کو موخر کرنا اس بات کا بین ثبوت ہے کہ بھاجپا نے ہار تسلیم کی ہے۔ان کے مطابق پی ڈی پی غریب پارٹی ہے، ہمارے کارکن اپنی جیبوں سے پیسے خرچ کر رہے ہیں تاہم اس کے باوجود بھی چناو کمیشن نے الیکشن کو موخر کیا۔محبوبہ مفتی نے کہاکہ بی جے پی کی جانب سے لوگوں کو دھمکیاں دی جارہی ہیں کہ اگر انہوں نے پراکیسی امیدوار کے حق میں اپنے ووٹ کا استعمال نہیں کیا تو 1947جیسے حالات پیدا کریں گے۔انہوں نے کہاکہ بھاجپا لیڈروں کی جانب سے رائے دہند گان کو دھمکیاں دینا ناقابل برداشت ہے اور اس حوالے سے چناو کمیشن کو سخت کارروائی عمل میں لانی چاہئے۔
محبوبہ مفتی نے دعویٰ کیا کہ پی ڈی پی جموں وکشمیر کے لوگوں کے دلوں میں بستی ہے۔انہوں نے کہا: ‘پی ڈی پی لوگوں کے دلوں میں بستی ہے، ہوسکتا ہے کہ کچھ لوگ کچھ دیر تک ہم سے ناراض تھے’۔ان کا کہنا تھا: ‘جو کام پی ڈی پی نے تین برسوں میں کئے دوسری جماعتوں نے وہ کام پچاس برسوں میں بھی نہیں کیا’۔
