پٹنہ: بہار میں کابینہ کی توسیع آج ہوگی۔ خبروں کے مطابق راج بھون نے ساڑھے گیارہ بجے کا وقت دیا ہے۔ آر جے ڈی اور کانگریس نے ممکنہ وزراء کی فہرست جے ڈی یو لیڈر وجے چودھری کو سونپی ہے۔ ذرائع سے ملی اطلاع کے مطابق کابینہ میں آر جے ڈی کی حصہ داری زیادہ ہوسکتی ہے۔ دریں اثنا، بہار قانون ساز اسمبلی میں اسپیکر کا عہدہ آر جے ڈی اور قانون ساز کونسل میں چیئرمین کا عہدہ جنتادل یونائیٹیڈ کو دینے پر تقریباً اتفاق ہو گیا ہے۔
خبروں کے مطابق آر جے ڈی کو پچھلی کابینہ میں بی جے پی کے کوٹے سے زیادہ تر قلمدان ملیں گے۔ نائب وزیر اعلیٰ تیجسوی یادو نے وزیر اعلیٰ نتیش کمار سے ملاقات کی ہے اور ان سے ممکنہ نام پر تبادلہ خیال کیا ہے۔ یہی نہیں حکومت سازی کے حوالے سے بھی ان کے درمیان تفصیلی بات چیت ہوئی ہے۔
نتیش کابینہ کے تمام وزراء ایک ساتھ حلف نہیں لیں گے۔ کچھ وزراء منگل کو حلف اٹھائیں گے۔ طے شدہ فارمولے کے مطابق آر جے ڈی کے لیے 17، جے ڈی یو کے لیے 13، کانگریس کے لیے 2، ایچ اے ایم کے لیے 1، آزاد امیدواروں کے لیے 1 وزارتی عہدہ تقریباً طے ہے۔ کچھ محکمے بشمول تعلیم، دیہی کام آر جے ڈی کے کھاتے میں جاسکتے ہیں جبکہ مالیات جے ڈی یو کے پاس جا سکتے ہیں۔ جے ڈی یو کے کچھ پرانے وزراء کو بھی ہٹائے جانے کا امکان ہے۔ ساتھ ہی کچھ نئے چہروں کو بھی جگہ مل سکتی ہے۔
خبروں میں یہ دعوی کیاجارہاہے کہ آر جے ڈی کوٹہ سے تیج پرتاپ یادو، آلوک مہتا، کمار سروجیت، سمیر مہاسٹھ، انیتا دیوی، للت یادو، رشی کمار، سریندر یادو، چندر شیکھر، کارتک کمار، سدھاکر سنگھ، شمیم احمد، رنوجے ساہو، اختر الاسلام شاہین وزیر بنائے جاسکتے ہیں۔ جبکہ دوسری طرف
جے ڈی یوکے کوٹہ سے وجے کمار چودھری، بیجندر پرساد یادو، شراون کمار، سنجے جھا، اشوک کمار چودھری، لیشی سنگھ، مدن ساہنی، زماں خان، سنیل کمار، شیلا منڈل کا نام ممکنہ وزرا کی لسٹ میں شامل بتایا جارہاہے۔اسی کے ساتھ خبر یہ بھی ہے کہ کانگریس سے مراری گوتم اور شکیل احمد کو وزارت میں شامل کیاجاسکتاہے۔
آر جے ڈی کی جانب سے اسمبلی اسپیکر کے لیے اودھ بہاری چودھری کا نام چل رہا ہے۔ آر جے ڈی نے انہیں اس عہدے کے لیے الیکشن لڑنے کے لیے بھی کہا تھا۔ انہیں 17ویں بہار قانون ساز اسمبلی کے اسپیکر کے عہدے کے لیے عظیم اتحاد کا امیدوار بنایا گیا تھا۔ قانون ساز کونسل میں اسپیکر کے لیے جے ڈی یو کی جانب سے پروفیسر۔ راموچن رائے کا نام چل رہا ہے۔ اس وقت قانون ساز کونسل میں کارگزار چیئرمین اودھیش نارائن سنگھ ہیں۔ وہ نتیش کمار کے قریب ہیں۔جب سے بی جے پی حکومت سے الگ ہوئی ہے۔ وہ نہیں چاہتی کہ اودھیش نارائن سنگھ چیئرمین کے عہدے پر رہیں۔
