نتیش کمار سات جنم تک بی جے پی میں نہیں جائیں گے : للن

پٹنہ (یواین آئی ) جے ڈی یو کے قومی صدر اور لوک سبھا ممبر پارلیمنٹ راجیو رنجن سنگھ عرف للن سنگھ نے بھارتیہ جنتا پارٹی کے خلاف شدید حملہ کیا اور میڈیا میں جان بوجھ کر بھرم پھیلانے کا سنگین الزام لگایا۔ انہوں نے کہا کہ وزیر اعلیٰ نتیش کمار اپوزیشن اتحاد کی علامت ہیں اور وہ سات جنم تک بی جے پی کے ساتھ نہیں جائیں گے۔ پارٹی کے قومی صدر راجیو رنجن سنگھ عرف للن سنگھ نے کہا کہ گودی میڈیا وزیر اعلیٰ نتیش کمار کے بی جے پی میں شامل ہونے کی جھوٹی خبریں دکھا کر لوگوں میں الجھن پھیلا رہا ہے۔ انہوں نے کہا کہ امت شاہ گودی میڈیا کے ڈائریکٹر ہیں اور یہ سارا کام ان کی ہدایت پر ہو رہا ہے۔
جے ڈی یوکے قومی صدر راجیو رنجن سنگھ عرف للن سنگھ نے کہا کہ وزیر اعلیٰ نتیش کمار کی کوششوں سے آج ملک کی پوری اپوزیشن ایک پلیٹ فارم پر آگئی ہے اور یہی سال 2024 کے لوک سبھا انتخابات میں بی جے پی کو اقتدار سے باہر کرنے کا راستہ دکھائے گی۔. انہوں نے کہا وزیر اعلیٰ نتیش کمار کی بی جے پی سے کوئی قربت نہیں ہے اور وہ ریاست کے لوگوں کی فلاح و بہبود کے لیے دن رات کام کر رہے ہیں۔ انہوں نے کہا کہ ملک میں اپوزیشن ’انڈیا اتحاد‘بننے کے بعد مرکز کی نریندر مودی حکومت گھبراہٹ میں ہے اور جان بوجھ کر ایسی جھوٹی خبریں پھیلا رہی ہے۔پارٹی کے قومی صدر نے بی جے پی لیڈر سشیل مودی کو آڑے ہاتھوں لیتے ہوئے کہا کہ ان کے بیانات کا کوئی نوٹس نہیں لیتا اور سشیل مودی میڈیا میں رہنے کے لیے ہر روز اناپ شناپ بیانات دیتے رہتے ہیں۔ انہوں نے کہا کہ وہ چاہیں گے کہ بی جے پی کی مرکزی قیادت ان کے بیانات کا نوٹس لے اور انہیں مرکز میں کوئی عہدہ دے۔ انہوں نے کہا کہ سشیل مودی اچھی طرح جانتے ہیں کہ جب تک وہ روزانہ نہیں بولیں گے، مرکز میں ان کی باتوں کا کوئی نوٹس نہیں لے گا۔