بلندشہر(یواین آئی) اترپردیش کے وزیر اعلی یوگی آدتیہ ناتھ نے جمعرات کو کہا کہ سماج وادی پارٹی اور بہوجن سماج پارٹی کے میعاد کار میں فساد اور کرفیو عام بات تھی جبکہ ان کی حکومت میں پختہ نظم ونسق کی وجہ سے ترقی کا راج قائم ہے۔سکندرآباد میں منعقد عوامی ریلی سے خطاب کرتے ہوئے یوگی نے کہا کہ عقیدہ، سیکورٹی و استحکام کے لئے بی جے پی ضروری ہے۔ ایس پی۔ بی ایس پی و کانگریس کے لوگ کرفیو والے ہیں۔ ان کے راج میں مہینوں کرفیو رہتا تھا لیکن آج ریاست میں کرفیو نہیں ہے۔ فساد کراکر یہ لوگ ریاست کو افراتفری میں مبتلا رکھتے تھے۔وہ فساد کی پالیسی چلاتے تھے، ہم ترقی کی پالیسی چلاتے ہیں۔
انہوں نے کہا’آج ہم سب ایک نئے ہندوستان میں ہیں۔ جو لوگ 2014 کے انتخابات کے گواہ ہیں وہ جانتے ہیں کہ اس وقت ہندوستان کیسا تھا۔ وہ موجودہ نسل اور نئے ووٹرز کو بتائیں کہ اس سے پہلے عوام میں ناراضگی اور عدم اعتماد تھا۔ ملک میں دہشت گردی، نکسل ازم اور علیحدگی پسندی عروج پر تھی۔ملک کے تمام اداروں میں کرپشن اپنے عروج پر تھی۔ نوجوان مایوس تھا اور کسان خودکشی کر رہا تھا۔
یوگی نے کہا کہ دس سالوں میں ہم نے بدلتا ہوا ہندوستان دیکھا ہے۔ نکسل ازم اور دہشت گردی وغیرہ جیسے مسائل حل ہو چکے ہیں۔ کانگریس نے مسئلہ دیا۔ جموں سمیت پورا ملک دہشت گردی کی لپیٹ میں آگیا۔ آئے روز دھماکے ہوتے تھے، بے گناہ لوگ مرتے تھے۔خاندان تباہ ہوئے، لیکن کانگریس والے تماشائی بنے رہے۔ ایک بار بھی یہ لوگ دہشت گردی کے خلاف بولنے کو تیار نہیں تھے لیکن آج آرٹیکل 370 ختم کر دیا گیا۔
انہوں نے کہا کہ جیور میں بننے والا ایشیا کا سب سے بڑا ائیر پورٹ ترقی کی ایک مثال ہے۔ اس کا سب سے زیادہ فائدہ سکندرآباد اور جیور کو ہوگا۔ انہوں نے کہا کہ ملک اور ریاست کی معیشت مضبوط ہوئی ہے۔ ہم تیز رفتار ریل کی سہولت فراہم کرنے جا رہے ہیں۔میٹرو آرہی ہے۔ ریل رابطہ، دادری میں وقف فریٹ کوریڈور کا جنکشن، ملک کا سب سے بڑا لاجسٹکس سنٹر بھی یہاں بننے جا رہا ہے، جہاں لاکھوں ملازمتیں پیدا ہوں گی۔
گوتم بدھ نگر کے ایم پی اور بی جے پی امیدوار ڈاکٹر مہیش شرما کو ووٹ دینے کی اپیل کرتے ہوئے انہوں نے کہا کہ اتر پردیش میں کوئی بیمار ہوگیا ہے۔ اس کے پاس آیوشمان کارڈ نہیں ہے۔ اگر ایم پی ایم ایل اے اور متاثرہ شخص خط لکھتا ہے تو رقم براہ راست اکاؤنٹ میں بھیجی جاتی ہے۔حکومت اس بات کو یقینی بنانے کی ذمہ داری لیتی ہے کہ بیماری اور علاج کے اخراجات کی وجہ سے خاندان پر کوئی مالی بوجھ نہ پڑے۔ نوئیڈا، گرینو اور یمنا اتھارٹی میں بلڈر -بائرس کے مسائل کو حل کرکے برسوں سے زیر التوا مقدمات کو بند کرکے خریداروں کو حقوق دلائے جارہے ہیں۔
یوگی نے کہا کہ پہلے ایسے لوگ تھے جو ملک کے مفاد کے بارے میں نہیں بلکہ خاندان کے بارے میں سوچتے تھے۔ یہ انتخاب مفاد پرست پریوار بمقابلہ مودی پریوار (140 کروڑ کا ہندوستان) کے درمیان ہے۔ ایس پی، بی ایس پی اور کانگریس کے لوگ اپنے خاندان سے باہر سوچ بھی نہیں سکتے۔اب سیکورٹی سرمایہ کاری کے لیے بہتر ماحول ہے۔انہوں نے تیسری بار نریندر مودی کو وزیر اعظم و ڈاکٹر مہیش شرما کو ایم پی بنانے کی اپیل کی۔ یوگی نے کہا کہ الیکشن میں متعدد لوگ آئیں گے۔ ذات۔علاقہ کا سہارا لیں گے۔ ان سے کہنا کہ الیکشن بعد آنا۔ ہمیں حب الوطن اور ترقی پسند سوچ والی حکومت چاہئے اور وہ صرف کمل کے پھول سے ہی ممکن ہوپائے گا۔وزیر اعلی نے موسم کی پرواہ کئے بغیر ووٹنگ کی اپیل کی۔