پہلے دو گھنٹوں میں تقریباً 13 فیصد ووٹنگ درج کی گئی
رائے پور ( یو این آئی ) چھتیس گڑھ میں آج دوسرے اور آخری مرحلے کے اسمبلی انتخابات کی 70 اسمبلی سیٹوں پر سخت حفاظتی انتظامات کے درمیان ووٹنگ جاری ہے۔ پہلے دو گھنٹوں میں تقریباً 13 فیصد ووٹنگ کی اطلاعات ہیں۔ریاستی الیکشن افسر کے دفتر سے موصولہ اطلاع کے مطابق پہلے دو گھنٹوں میں ضلع کوربا میں 11 فیصد، کوریا میں 10، گریابند میں 17، پیندرا مرواہی میں 12، جش پور میں 12، جنجگیر میں 12، درگ میں 11، 8 فیصد ،دھمتری میں 8، بسرام پور میں 14، بلودہ بازار میں 10، بلود میں 10، بلاس پور میں 10، بیمترا میں 16، مانیندر گڑھ میں 11، مہاسمنڈ میں 12، منگیلی میں 7، رائے گڑھ میں 10، رائے پور میں 13، ساکتی میں 8، سرگوجا میں 12، سارنگڑھ میں 12 اور سورج پور میں تقریباً 13 فیصد ووٹنگ ہوئی۔
ووٹنگ کے حوالے سے عوام میں زبردست جوش و خروش پایا جاتا ہے۔ صبح آٹھ بجے ووٹنگ شروع ہوئی تو کئی پولنگ اسٹیشنوں پر ووٹرز کی قطاریں لگ گئیں۔ راجدھانی رائے پور کے بیشتر پولنگ اسٹیشنوں پر ووٹنگ شروع ہوتے ہی لمبی قطاریں نظر آنے لگیں۔ پولنگ اسٹیشنز پر مردوں کے ساتھ ساتھ خواتین کی بھی لمبی قطاریں لگی ہیں۔ پہلے گھنٹے میں ووٹنگ کی رفتار تھوڑی سست تھی لیکن اب اس نے رفتار پکڑ لی ہے۔
ریاستی الیکشن افسر کے دفتر سے موصولہ اطلاع کے مطابق ووٹنگ صبح 8 بجے شروع ہوئی اور شام 5 بجے تک جاری رہے گی۔ نکسل سے متاثرہ بندرانوا گڑھ اسمبلی حلقہ کے 9 پولنگ اسٹیشنوں – کماربھودی، آمورا، اودھ، بڑے گوبرا، گنوارگاؤں، غریبہ، ناگیش، صاحبینکچھار اور کوڈومالی میں صبح 7 بجے ووٹنگ شروع ہوئی جو سہ پہر 3 بجے تک جاری رہے گی۔ ان کے علاوہ بندرانوا گڑھ کے باقی پولنگ اسٹیشنوں میں بھی دیگر 69 اسمبلی حلقوں کی طرح ووٹنگ صبح 8 بجے شروع ہوئی اور شام 5 بجے تک جاری رہے گی۔ریاست میں فی پولنگ اسٹیشن پر ووٹروں کی اوسط تعداد 866 ہے۔ ریاست کا سب سے چھوٹا پولنگ اسٹیشن بھرت پور-سونہت اسمبلی حلقہ کے شیراڈانڈ گاؤں میں بنایا گیا ہے جہاں محض پانچ ووٹر ہیں۔
ووٹنگ کے اس مرحلے کے دوران ریاست کے ایک کروڑ 63 لاکھ 14 ہزار 479 ووٹر اپنے حق رائے دہی کا استعمال کریں گے۔ ان میں 81 لاکھ 41 ہزار 624 مرد ووٹرز، 81 لاکھ 72 ہزار 171 خواتین ووٹرز اور 684 تیسری صنف کے ووٹرز شامل ہیں۔ ووٹنگ کے پرامن انعقاد کو یقینی بنانے کے لیے مجموعی طور پر 18 ہزار 833 پولنگ اسٹیشنز بنائے گئے ہیں۔ ان میں سے 727 سنگواری پولنگ اسٹیشن ہیں جہاں صرف خواتین پولنگ اہلکار تعینات ہوں گی۔
