مودی کے دورہ جموں وکشمیر کے مدنظر بے نظیر سیکورٹی

سری نگر(یو این آئی)انسپکٹر جنرل آف پولیس (آئی جی پی ) کشمیر وی کے بردی نے اتوار کے روز یہاں پولیس کنٹرول روم سری نگر میں ایک میٹنگ کے دوران سیکورٹی صورتحال کا جائزہ لیا۔انہوں نے اس دوران افسروں پر زوردیا کہ ملک دشمن عناصر کے منصوبوں کو ناکام بنانے کی خاطر وادی کے سبھی اضلاع میں ملی ٹینٹ مخالف آپریشنزکا دائرہ وسیع کیا جائے۔پولیس ترجمان نے اپنے ایک بیان میں تفصیلات فراہم کرتے ہوئے کہا کہ کشمیر میں سیکورٹی منظر نامے کے مزید استحکام کو یقینی بنانے کے لئے آئی جی پی کشمیر وی کے بردی نے یہاں پی سی آر سری نگر میں منعقدہ ایک میٹنگ کے دوران سیکورٹی صورتحال کا جامع جائزہ لیا۔
انہوں نے کہا کہ میٹنگ کے دوران وادی کشمیر کے سیکورٹی منظر نامے کے حوالے مختلف امور زیر بحث آئے۔ان کا کہنا تھا کہ موصوف آئی جی پی نے ضلع کو درپیش موجودہ سیکورٹی خطرات و چیلنجز کی تشخیص پر زور دیا۔پولیس بیان کے مطابق مسٹر بردی نے افسروں اور قانون نافذ کرنے والے اداروں کو ہدایت دی کہ وہ کسی بھی سیکورٹی واقعے سے نمٹنے کے لئے فوری کارروائیوں کو یقینی بنائیں۔پولیس بیان میں کہا گیا: ‘آئی جی پی نے مجموعی سیکورٹی صورتحال کے استحکام کے لئے مختلف قابون نافذ کرنے والے اداروں کے درمیان مضبوط تعاون ہونے پر زور دیا’۔انہوں نے کہا کہ موصوف آئی جی پی نے سیکورٹی ایجنسیوں اور عوام کے درمیان تعاون اور اعتماد کی بنیادوں پر مثبت تعلقات بنانے پر زور دیا’۔
بیان کے مطابق انہوں نے انٹلی جنس شیئرنگ میکانزم کو مضوط بنانے کرنےکے احکامات صادر کئے۔میٹنگ کے دوران شرکاءنے آنے والے پروگراموں کے پیش منظر میں وضح کئے گئے سیکورٹی پلان کے بارے میں آئی جی کشمیر کو جامع بریفنگ دی ۔
اس موقع پر آئی جی کشمیر نے آفیسران پر زور دیا کہ آنے والی تقریبات کو بہ احسن خوبی پایہ تکمیل تک پہنچانے کی خاطر زمینی سطح پر اقدامات اٹھانے کی ضرورت ہے۔آئی جی پی نے دہشت گردی کے خطرات کو کم کرنے کی خاطر رات کے اوقات میں مزید چوکسی برتنے کی بھی تلقین کی ۔انسپکٹر جنرل آف پولیس وی کے بردی نے انسداد دہشت گردی کی کارروائیوں کو مزید تیز تر کرنے کے احکامات صادر کئے۔انہوں نے آفیسروں پر زوردیا کہ اہم پروگراموں کے دوران قومی شاہراہ کی سیکورٹی بڑھانے ، جہاں پر اقلیتی فرقے سے وابستہ لوگ رہائش پذیر ہیں وہاں سیکورٹی فورسز کی اضافی نفری تعینات کرنے اور دیگر اہم مقامات پر سیکورٹی گرڈ مضبوط کرنے کی اہمیت پر بھی زور دیا۔انہوں کے سری نگر کے سیول لائنز اور پائین شہر میں ناکوں کا جال بچھانے کے بھی احکامات صادر کئے تاکہ امن دشمن عناصر کے منصوبوں کو ناکام بنایاجاسکے۔
آئی جی پی نے تقریبات کے دوران سیکورٹی کے بڑھتے ہوئے خدشات کو مدنظر رکھتے ہوئے ایس او پیز کا خیال رکھنے پر بھی زور دیا ہے۔
انہوں نے مشکوک سرگرمیوں کے خلاف فوری کارروائی کرنے کے احکامات صادر کئے۔انہوں نے سرحدی علاقوں میں تعینات پولیس آفیسران کو خصوصی ہدایات دیں کہ ممکنہ دہشت گردی سرگرمیوں کو روکنے کے لئے کنٹرول لائن اور اندرونی علاقوں میں سخت چوکسی برتیں ۔بیان کے مطابق انہوں نے زونل ایس ایس پیز سے قوم دشمن اور سماج دشمن عناصر پر کڑی نگاہ رکھنے کی بھی تاکید کی۔
اس اعلیٰ سطحی میٹنگ میں آئی جی سی آر پی ایف، آئی جی بی ایس ایف، ڈپٹی ڈائریکٹر انٹیلی جنس بیورو کشمیر ، ڈی آئی جی سینٹرل کشمیر ، ، ایس ایس پی سری نگر، سراغ رساں ایجنسیوں کے سینئر آفیسران کے علاوہ ، ایس ایس پیز اور ایس پیز نے شرکت کی۔
واضح رہے کہ وزیر اعظم نریندر مودی 20فروری کو جموں وارد ہو رہے ہیں جبکہ وزیر دفاع راج ناتھ سنگھ 24فروری کو ادھم پور کا دورہ کریں گے ۔ذرائع نے بتایا کہ وزیر اعظم اور وزیر دفاع کے بعد متعدد مرکزی وزراءکا بھی جموں وکشمیر کا دورہ متوقع ہے جس کے پیش نظر مرکز کے زیر انتظام جموں وکشمیر کے سبھی اضلاع میں سیکورٹی کو ہائی الرٹ پر رکھا گیا ہے۔