اسٹالن نے مودی کو خط لکھ کر 5,060 کروڑ روپے کی عبوری راحت مانگی

چنئی، 06 دسمبر (یو این آئی) تمل ناڈو کے وزیر اعلی ایم کے اسٹالن نے بدھ کے روز وزیر اعظم نریندر مودی کو ایک خط لکھا جس میں 5,060 کروڑ روپے کی عبوری راحت دینے اور سمندری طوفان میچونگ سے متاثرہ علاقوں کا دورہ کرنے کے لئے ایک مرکزی ٹیم بھیجنے کی اپیل کی گئی ہے۔ سائیکلون میچونگ کی وجہ سے چنئی اور اس کے تین پڑوسی اضلاع میں زبردست بارش ہوئی۔ مسٹر اسٹالن نے کہا کہ ریاستی حکومت نے بھی طوفان سے ہونے والے نقصان کا اندازہ لگانا شروع کر دیا ہے اور وہ ایک تفصیلی رپورٹ تیار کرے گی اور مرکزی حکومت سے اضافی فنڈز کی درخواست کرے گی۔ انہوں نے کہا تھا کہ ریاستی حکومت سیلاب زدہ چنئی اور چنگل پٹو، کانچی پورم اور تروولور اضلاع میں امدادی اقدامات کرنے کے لیے مرکز سے عبوری راحت کے طور پر 5,000 کروڑ روپے طلب کرے گی۔ اب مسٹر اسٹالن نے اس سلسلے میں وزیر اعظم کو ایک خط لکھ کر فوری راحت کے طور پر 5,060 کروڑ روپے کا مرکزی فنڈ جاری کرنے کی مانگ کی ہے۔
یہاں ایک سرکاری ریلیز میں کہا گیا کہ مسٹر اسٹالن نے مسٹر مودی کو بتایا کہ طوفان کی وجہ سے چنئی، ترووالور، کانچی پورم اور چنگل پٹو اضلاع میں بے مثال بھاری بارش ہوئی۔ اس سے سڑکوں، پلوں، عوامی عمارتوں اور دیگر انفراسٹرکچر کو نقصان پہنچا۔ ریلیز میں کہا گیا ہے کہ مسٹر اسٹالن نے مسٹر مودی کو لکھے گئے اپنے خط میں ان حقائق کا تفصیل سے ذکر کیا ہے اور عبوری ریلیف کے طور پر فوری طور پر 5,060 کروڑ روپے جاری کرنے کا مانگ کی ہے۔