بیت المقدس:فلسطینی وزارت صحت نے کہا ہے کہ اسرائیلی فورسز نے اتوار کی صبح مغربی کنارے میں ایک چھاپے میں دو فلسطینیوں کو گولی مار کر ہلاک کر دیا۔اسرائیلی فوج نے کہا ہے کہ اس نے مقبوضہ علاقے میں "انسداد دہشت گردی” کی سرگرمیاں انجام دی ہیں۔فلسطینی وزارت نے بتایا کہ طولکرمم قصبے میں دونوں فلسطینی اسرائیلی گولیاں سر پر لگنے سے ہلاک ہو گئے”۔ایک بیان میں اسرائیلی فوج کا کہنا ہےکہ قصبے کے قریب نور شمس پناہ گزین کیمپ میں جھڑپوں کے دوران ایک فوجی "گولیوں کے ٹکڑوں سے معمولی زخمی” ہوا ہے۔
قبل ازیں اطلاع میں بتایا گیا کہ غزہ میں فلسطینی شہری علیحدگی کی باڑ پر نسبتاً پرسکون رہنے کے بعد آٹھ دنوں سے احتجاجی مظاہرے کر رہے ہیں۔ اسرائیلی فورسز نے ان پر براہ راست گولیاں برسائیں اور فلسطینی نوجوانوں نے اسرائیلی فورسز پر پتھراؤ اور دیسی ساختہ بم پھینکے۔
اسرائیلی فوج نے ایک بیان میں کہا ہے کہ اس نے غزہ کی پٹی میں سکیورٹی سرحدوں سے ملحقہ حماس کے ٹھکانوں پر بمباری کی ہے۔ غزہ کے رہائشیوں کا کہنا ہے کہ یہ مظاہرے اسرائیلی جیلوں میں فلسطینی قیدیوں کے ساتھ ناروا سلوک اور مسجد اقصیٰ میں یہودیوں کے دھاوے اور دیگر مسائل کے خلاف احتجاج ہیں۔
اسرائیلی فوج کا کہنا ہے کہ مظاہرین نے آگ لگانے والے غبارے بھی اسرائیلی علاقے میں پھینکے ہیں جس سے باڑ کے قریب علاقوں میں آگ لگ گئی۔ فلسطینی وزارت صحت نے جمعہ کو کہا تھا کہ جھڑپوں کے دوران 31 فلسطینی زخمی ہوئے ہیں۔ یہ مظاہرے اسرائیلی فورسز کے ہاتھوں ایک فلسطینی کے جاں بحق ہونے کے چند روز بعد شروع ہوئے ہیں۔
خیال رہے کہ اسرائیل نے جمعے کو رات گئے سے غزہ کی پٹی پر فضائی حملوں کا سلسلہ شروع کر رکھا ہے۔ دوسری طرف فلسطینیوں کی جانب سے اسرائیل پر آگ لگانے والے غبارے چھوڑے گئے جب کہ ایک ہفتے تک غیر مستحکم سرحد پر تشدد میں اضافہ ہوا ہے۔
غزہ کے ساتھ اسرائیلی محاذ پر بڑھتی ہوئی کشیدگی اس وقت سامنے آئی جب مقبوضہ مغربی کنارے میں لڑائی اس سطح تک بڑھ گئی جو دو دہائیوں سے خطے میں نہیں دیکھی گئی۔ جمعے کے روز ہونے والے تازہ ترین تشدد میں اسرائیلی فوج نے شمالی مغربی کنارے میں ایک فلسطینی کو گولی مار کر شہید کر دیا۔فلسطینی حریت پسند گذشتہ ہفتے سے غزہ اور اسرائیل کو الگ کرنے والی باڑ کے قریب احتجاج کر رہے ہیں۔ اسرائیلی فوجیوں نے مظاہرین پر آنسو گیس کی شیلنگ اور براہ راست گولیاں چلائیں۔بدامنی کے موجودہ دور میں پہلی بار فلسطینی مظاہرین نے جمعہ کے روز اسرائیل کی طرف غبارے چھوڑے، جس سے سرحد کے دوسری طرف پودوں کے بڑے علاقے میں آگ لگ گئی۔فلسطینی محکمہ صحت کے حکام کا کہنا ہے کہ سرحدی باڑ پر احتجاج کے دوران اسرائیلی فائرنگ سے 28 فلسطینی زخمی ہوئے۔گذشتہ ہفتے کے دوران ہونے والی بدامنی نے کشیدگی میں اضافہ کیا جس کے بعد اسرائیل کو غزہ کی پٹی سے ہزاروں افراد کو کام کے لیے دوسرے فلسطینی علاقوں میں جانے سے روک دیا۔
