نئی دہلی، 26 جولائی (یو این آئی ) مرکزی وزارت اقلیتی امور نے قومی راجدھانی دہلی میں دستکاری کے فن اور ہنر پر مبنی لوک سموردھن ایگزبیشن کا اہتمام کیا ہے۔ یہاں دہلی ہاٹ میں 16 جولائی کو شروع ہونے والی یہ نمائش آئندہ 31 جولائی تک جاری رہے گی ۔وزارت اقلیتی امور کے نیشنل مائناریٹیز ڈولپمنٹ اینڈ فنانس کارپوریشن کی چیف منیجنگ ڈائریکٹر ڈاکٹر آبھا رانی سنگھ نے آج یہاں یو این آئی اردو سروس کو بتایا کہ وزیراعظم نریندر مودی کی ترغیب پر اس نمائش کا اہتمام کیا گیا ہے اور یہ اپنی نوعیت کی 9 ویں نمائش ہے ۔ انہوں نے بتایا کہ اس نمائش میں ملک بھر کی 30 ریاستوں اور مرکز کے زیرانتظام علاقوں کے 162 اسٹال لگائے گئے ہیں، جن میں ماہر دستکار اور ہنرمند شرکت کر رہے ہیں ، جنہیں حکومت کی طرف سے آمدو رفت اور قیام و طعام کی سہولتوں کے علاوہ اسٹال لگانے کے لئے مفت جگہ اور دیگر سہولتیں فراہم کرائی گئی ہیں اور یہ تمام اسٹال اقلیتی طبقات کے لوگوں کے ہیں ۔
محترمہ آبھارانی نے بتایا کہ اس طرح کی نمائش لگانے کا مقصد ملک بھر کی دستکاری اور وراثتی ہنر کے فن کو زندہ رکھنے کے ساتھ ساتھ ان کو فروغ دینا ہے۔ انہوں نے کہا کہ وزارت اقلیتی امور نے ان ہنرمندوں کو ایسا پلیٹ فارم فراہم کیا ہے، جس میں وہ اپنے ہاتھوں سے تیارکردہ مصنوعات زیادہ سے زیادہ فروخت کرکے روزگار کے نئے مواقع پیدا کرسکیں اور اس طرح ہنر کو فروغ دیا جائے۔محترمہ آبھا رانی نے بتایا کہ اس نمائش میں اسٹال لگانے والوں میں کئی ایسے افراد ہیں، جن کو اپنے فن میں مہارت کی وجہ سے پدم شری ایوارڈ سے نوازا گیا ہے۔ انہوں نے بتایا کہ ’’لوک سموردھن پرو‘‘ کی نمائش میں بچوں سے متعلق کئی پروگرام بھی لائیو دکھائے جاتے ہیں تاکہ انہیں بچپن سے ہی ان مصنوعات اور ہنر سے متعلق و اقفیت ہوسکے اور ان کے اندر مثبت جذبہ پیدا ہوسکے۔ انہوں نے مزید بتایا کہ لوک سموردھن پرو کے مختلف پرگراموں کے ذریعے اقلیتی طبقات کے دستکاروں اور ہنرمندوں کو ٹریننگ بھی دی جاتی ہے، جس میں جدیدترین ڈیزائن اور جدید تکنیک کا استعمال شامل ہے۔
نمائش میں بنارس سے آئے محمد سلیم، ممتاز انصاری اور مولانا انور نے بنارسی مصنوعات کے شاندار ڈیزائن والے خوبصورت کپڑوں کی نمائش لگا رکھی ہے جبکہ جودھپور کے محمد رمضان چھیپپا نے راجستھان کے بلاک پرنٹ والے کپڑوں کے شاندار ڈیزائن کی نمائش لگا رکھی ہے۔ اس بار پہلی مرتبہ لداخ کے فنکاروں نے اپنی فنی مہارت کی نمائش لگائی ہے۔ جبکہ دیگر تمام ریاستوں کی خاص اور خوبصورت مصنوعات اس نمائش کی زینت بن رہی ہیں ۔
خیال رہے کہ دہلی ہاٹ میں جاری یہ نمائش 31 جولائی تک جاری رہے گی۔
