ہماچل پردیش میں غیر معمولی برف باری

شملہ، 5 فروری (یو این آئی) ہماچل پردیش میں پہاڑی علاقوں میں گزشتہ دو دن شدید برف باری ہوئی ہے۔ لاہول اسپتی، کنور، کلو، شملہ اور چمبہ اضلاع میں شدید برف باری ہوئی ہے۔اونچے علاقوں میں اس موسم سرما میں جمعہ سے اتوار کی رات تک شدید برف باری ہوئی۔ اس برف باری سے معمولات زندگی درہم برہم ہونے سے لوگوں کی مشکلات میں اضافہ ہوگیا ہے۔ فی الحال اگلے پانچ روز تک موسم صاف رہنے کا امکان ہے۔ اسٹیٹ ایمرجنسی آپریشن سینٹر کی رپورٹ کے مطابق برف باری اور بارش کی وجہ سے ریاست بھر میں 645 سڑکیں اور 1416 پاور ٹرانسفارمر ٹھپ ہیں۔
برف باری کے باعث چار قومی شاہراہوں پر ٹریفک متاثر ہے۔ رپورٹ کے مطابق شملہ ضلع میں سب سے زیادہ 242 سڑکیں بند ہیں۔ شملہ ضلع کے بالائی علاقوں میں گزشتہ پانچ دنوں سے بس سروس ٹھپ ہے۔ اس کے علاوہ لاہول سپتی میں 157، کولو میں 93، چمبہ میں 61، منڈی میں 51، کنور میں 24 اور سرمور میں 16 سڑکیں بند ہیں۔ لاہول اسپتی اور کلّو اضلاع میں دو دو قومی شاہراہوں پر گاڑیوں کی آمدورفت پچھلے ایک ہفتے سے ٹھپ ہے۔
برف باری سے بجلی کی فراہمی پر بہت زیادہ اثر پڑا ہے۔ ریاست میں بجلی کے 1416 ٹرانسفارمر بند ہونے سے سیکڑوں خاندان تاریکی میں ہیں۔ کلو ضلع میں 485، چمبہ میں 319، سرمور میں 245، منڈی میں 221، شملہ میں 113 اور کنور ضلع میں 30 ٹرانسفارمروں سے بجلی کی سپلائی منقطع ہے۔
محکمہ موسمیات کے مطابق شملہ ضلع کے چڈگاؤں میں 35، کھدرالہ میں 30 اور نارکنڈہ میں 25 سینٹی میٹر تازہ برف پڑی ہے۔ جب کہ کلو ضلع کے سیاحتی مقام منالی میں 23، گنڈلا میں 16 اور کیلانگ اور شیلارو میں 15-15 سینٹی میٹر برفبای ریکارڈ کی گئی۔محکمہ موسمیات کی پیش گوئی کے مطابق ریاست میں آئندہ پانچ روز تک موسم صاف رہے گا۔شملہ میں واقع موسمیاتی مرکز کے ڈائریکٹر سریندر پال نے بتایا کہ پیر کو ریاست کے میدانی اور وسط پہاڑی علاقوں میں بارش اور اونچے پہاڑی علاقوں میں برف باری کا امکان ہے۔ انہوں نے کہا کہ ریاست بھر میں 6 فروری سے 10 فروری تک موسم صاف رہے گا۔