اکتوبرکے پہلے ہفتہ میں 5 جی خدمات کا آغازہوگا

نئی دہلی(ایم این این):وزیر اعظم نریندر مودی اکتوبر کے پہلے ہفتے میں ایک تقریب میں ہندوستان میں5 جی خدمات کا آغاز کریں گے۔ حکومت کے نیشنل براڈ بینڈ مشن نے آج ٹویٹ کیا۔”ہندوستان کی ڈیجیٹل تبدیلی اور کنیکٹیویٹی کو نئی بلندیوں پر لے کر، عزت مآب وزیراعظم نریندر مودی ، انڈیا موبائل کانگریس میں 5جی خدمات شروع کریں گے۔انڈیا موبائل کانگریس ، جو کہ ایشیا کا سب سے بڑا ٹیلی کام، میڈیا اور ٹیکنالوجی فورم ہونے کا دعویٰ کرتی ہے، مشترکہ طور پر محکمہ ٹیلی کمیونیکیشن اور سیلولر آپریٹرز ایسوسی ایشن آف انڈیا کے زیر اہتمام تقریب ہے۔مرکزی وزیر برائے مواصلات، الیکٹرانکس اور انفارمیشن ٹکنالوجی اشونی ویشنو نے گزشتہ ہفتے کہا تھا کہ حکومت نے مختصر وقت میں ملک میں5 جی ٹیلی کام خدمات کی 80 فیصد کوریج کا ہدف دیا ہے۔گزشتہ بدھ کو قومی راجدھانی میں ایک صنعتی تقریب سے خطاب کرتے ہوئے مسٹر ویشنو نے کہا تھا۔5 جی کا سفر بہت پرجوش ہونے والا ہے اور انہوں نے نوٹ کیا کہ بہت سے ممالک کو 40 فیصد سے 50 فیصد کوریج تک پہنچنے میں کئی سال لگے۔ لیکن ہم ہدف بنا رہے ہیں۔ ایک بہت ہی جارحانہ ٹائم لائن ہے اور حکومت نے مختصر وقت میں 80 فیصد کوریج کا ہدف دیا ہے اور ہمیں یقینی طور پر کم از کم 80 فیصد کو بہت کم وقت میں کور کرنا چاہیے۔