12 ممالک کے 66 شہریوں کا سوڈان سے کامیاب انخلا

نئی دہلی: سعودی عرب سوڈان میں پھنسے ہندوستانیوں کی مدد کے لیے آگے آیا ہے۔البرہان کی وفادارسوڈانی فوج اورآر ایس ایف کے درمیان جاری جنگ سے متاثرہ سوڈان سے 12 ممالک کے 66 شہریوں کو سعودی عرب لایا گیا ہے جن میں کچھ ہندوستانی بھی شامل ہیں۔ سعودی اور دیگر شہریوں کو لے کر ایک جہاز آج جدہ پہنچ گیا۔ اس سے قبل وزیر خارجہ ایس جے شنکر نے منگل کو اپنے سعودی ہم منصب فیصل بن فرحان السعود کے ساتھ سوڈان سے ہندوستانیوں کے انخلاء کے سلسلے میں بات چیت کی تھی۔ نیز، ہمارے مشن امریکہ اور برطانیہ کی حکومتوں کے ساتھ رابطے میں ہیں۔
سعودی وزارت خارجہ نے ٹویٹ کیا کہ ہمیں یہ بتاتے ہوئے خوشی ہو رہی ہے کہ مملکت کی قیادت کی ہدایات پر عمل کرتے ہوئے ہم سوڈان سے سعودی شہریوں کے ساتھ ساتھ دیگر دوست ممالک کے شہریوں کو بھی بحفاظت نکالنے میں کامیاب ہو گئے ہیں۔ ان میں سفارت کار اور بین الاقوامی اہلکار شامل ہیں۔
خبر رساں ایجنسی الاخباریہ کے مطابق، جدہ پہنچنے والوں میں سعودی مسافر بردار طیارے کا عملہ بھی شامل ہے جو 15 اپریل کو اس وقت آگ کی زد میں آ گیا جب وہ خرطوم سے لڑائی کے آغاز پر اڑان بھرنے کی تیاری کر رہا تھا۔
اے ایف پی کے مطابق سعودی عرب اور دیگر ممالک کے شہریوں کو گاڑیوں کے قافلے کے ذریعے پورٹ سوڈان پہنچایا گیا جہاں سے وہ بحری جہاز میں سوار ہو کر جدہ پہنچے۔ جہاں افسران اور جوانوں نے عید کے موقع پر مٹھائیاں تقسیم کرکے ان کا استقبال کیا۔
بتادیں کہ سوڈان میں فوج اور پیرا ملٹری کے درمیان جنگ جاری ہے۔ یہاں 3 ہزار سے زیادہ ہندوستانی پھنسے ہوئے ہیں۔