جیل میں بند ماؤنواز لیڈر ارنب کا پی ایچ ڈی میں داخلہ ہوگیا

کلکتہ 15جولائی(یواین آئی) ماؤنواز لیڈر ارنب ڈیم کا طویل جدوجہد کے بعد آج بردوان یونیورسٹی میں پی ایچ ڈی میں داخلہ ہوگیا۔ بردوان یونیورسٹی میں پیر کو ان کی کونسلنگ کا عمل مقررہ وقت پر مکمل ہوا۔ ارنب نے اعلیٰ تعلیم اور تحقیق کے مواقع فراہم کرنے پر یونیورسٹی انتظامیہ اور ریاستی حکومت کا شکریہ ادا کیا۔ارنب کو بردوان سنٹرل جیل سے پیر کو 2 بجے جیل وین میں یونیورسٹی کے گلاب باغ کیمپس کے احاطے میں لایا گیا۔ اس کے بعد انہیں کدمبینی گنگولی بھون لے جایا گیا۔ ارنب کے ساتھ سادہ لباس میں ملبوس پولیس اہلکار بھی تھے۔ ارنب کی کونسلنگ محکمہ تاریخ میں تقریباً دو گھنٹے تک ہوئی۔ اس کے بعد شام چار بجے کے قریب انہیں یونیورسٹی سے پولیس کی گاڑی میں بردوان سنٹرل جیل میں لے جایا گیا۔

ارنب کی کونسلنگ کے بعد شعبہ تاریخ کے سربراہ سید تنویر نسرین نے کہاکہ داخلہ کا عمل مکمل ہو گیا ہے۔ اس کے بعد اسے صرف فیس جمع کرنی ہوگی۔ اگلے جمعہ تک فیس جمع کرانے کا آخری دن ہے۔ لیکن اس کے لیے اسے یونیورسٹی نہیں آنا ہوگا۔ فیس آن لائن جمع کرائی جا سکتی ہے۔کونسلنگ کے بعد، پولیس کی گاڑی میں سوار ہونے سے پہلے ارنب نے کہاکہ آج کونسلنگ کی گئی ہے۔ میرے پی ایچ ڈی کے داخلے میں جو پیچیدگیاں پیدا ہوگئی تھیں ، امید ہے کہ آج ختم ہو گئی ہیں۔ ساتھ ہی انہوں نے مزید کہاکہ میں بردوان یونیورسٹی کا شکر گزار ہوں کہ انہوں نے مجھے اعلیٰ تعلیم اور تحقیق کا یہ موقع فراہم کیا۔ میں جیل حکام اور ریاستی حکومت کے تعاون کے بغیر اس مقام تک نہیں پہنچ سکتا تھا۔