پرچہ افشا ہونے کے الزامات کے بعد طلبہ کے مطالبے پر پہلے امتحان منسوخ کر دیا گیا تھا
لکھنؤ:25جولائی(یواین آئی) اترپردیش حکومت نے پہلے منسوخ ہونے والے پولیس ڈائرکٹ بھرتی امتحا ن کی نئی تاریخ کا جمعرات کو آفیشیلی اعلان کردیا۔ذرائع نے بتایا کہ یوپی پولیس ریکروٹمنٹ اینڈ پروموشن بورڈ 23 سول پولیس کی 60,244 اسامیوں پر براہ راست بھرتی-2023 کے لیے، 24، 25 ، 30 اور 31 اگست کو تحریری امتحان منعقد کرے گا۔
پرچہ افشا ہونے کے الزامات کے بعد طلبہ کے مطالبے پر پہلے امتحان منسوخ کر دیا گیا تھا۔ چیف منسٹر یوگی آدتیہ ناتھ نے افسران کو ہدایت کی تھی کہ وہ چھ ماہ کے اندر امتحان کو دوبارہ ترتیب دیں اور انصاف اور شفافیت کے اعلیٰ ترین معیارات کی پاسداری کو یقینی بنائیں۔
یوپی پولیس ریکروٹمنٹ اینڈ پروموشن بورڈ مقررہ تاریخوں پر 60,244 کانسٹیبل سول پولیس عہدوں پر براہ راست بھرتی کے لیے تحریری امتحان کا انعقاد کرے گا۔ جنم اشٹمی تہوار کی وجہ سے امتحانات کے شیڈول میں وقفہ رہے گا۔
امتحان ہر روز دو شفٹوں میں منعقد ہوگا، ہر شفٹ میں تقریباً 5 لاکھ امیدوار شرکت کریں گے۔ امتحان میں شرکت کرنے والے امیدواروں کو یوپی اسٹیٹ روڈ ٹرانسپورٹ کارپوریشن (UPSRTC) کی جانب سے مفت سفر کی سہولیت حاصل ہوگی۔ امیدوار اپنی سہولت کے مطابق اس سروس سے فائدہ اٹھا سکتے ہیں۔
بس سروس سے استفادے کے لئے امیدواروں کو اپنے ایڈمٹ کارڈ کی دو اضافی کاپیاں ڈاؤن لوڈ کرنی ہوں گی۔ ایک کاپی امتحان سنٹر تک پہنچنے کے لئے اور دوسری کاپی واپسی کے سفر کے لئے جسے دوران سفر بس کنڈکٹر کو پیش کرنا ہوگا۔
