نئی دہلی (یو این آئی) مرکزی تفتیشی بیورو (سی بی آئی) نے کرناٹک کے نائب وزیر اعلی ڈی کے شیوکمار پر مبینہ طورپر آمدنی سے زیادہ اثاثہ حاصل کرنے کے معاملے کی تحقیقات ریاستی لوک آیکت کو سونپنے کے فیصلے کے خلاف سپریم کورٹ سے رجوع کیا ہے۔کرناٹک حکومت نے اس کیس کی تحقیقات ریاستی لوک آیکت کو سونپنے کا فیصلہ کیا تھا۔کرناٹک ہائی کورٹ نے مسٹر شیوکمار کے خلاف بدعنوانی کے معاملے کی تحقیقات کے لیے رضامندی واپس لینے کے کانگریس حکومت کے فیصلے کو چیلنج کرنے والی درخواستوں کو 29 اگست کوخارج کر دیا تھا۔
ہائی کورٹ نے درخواستوں کو ‘غیر مستقل’ قرار دیا تھا۔ ہائی کورٹ نے مسٹر شیوکمار کے مبینہ غیر قانونی اثاثوں کی تحقیقات کے لیے رضامندی واپس لینے کے ریاست کے 28 نومبر 2023 کے فیصلے کو چیلنج کرنے والی درخواست کو بھی مسترد کر دیا۔سی بی آئی نے 25 ستمبر 2019 کو سابقہ بی جے پی حکومت کی رضامندی سے 3 اکتوبر 2020 کو مسٹر شیوکمار کے خلاف غیر متناسب اثاثوں کا مقدمہ درج کیا تھا۔سی بی آئی کا الزام ہے کہ مسٹر شیوکمار نے کانگریس کی سابقہ حکومت میں وزیر توانائی رہتے ہوئے اپریل 2013 سے اپریل 2018 تک آمدنی کے معلوم ذرائع سے زیادہ 74.93 کروڑ روپے کے اثاثے حاصل کیے۔کرناٹک بھارتیہ جنتا پارٹی (بی جے پی) کے ایم ایل اے بسنا گوڑا پاٹل یتنال نے پہلے ہی ہائی کورٹ کے فیصلے کو سپریم کورٹ میں چیلنج کیا تھا۔
