ریاست تلنگانہ سے 5278 عازمین حج کا قرعہ اندازی کےذریعہ انتخاب

حیدرآباد : صدر نشین تلنگانہ ریاستی حج کمیٹی محمد سلیم نے بتایا کہ تلنگانہ سے 5278 عازمین حج کا آن لائن ( ڈرا ) قرعہ اندازی کے ذریعہ انتخاب عمل میں آیا ہے ۔ انہوں نے منتخب عازمین حج کو ہدایت دی کے وہ پیر 10 اپریل سے قبل 81,800 روپئے حج کی پہلی قسط ادا کردیں ۔ بعد ادائیگی کے ڈاؤن لوڈ کی گئی حج درخواست اور ڈیکلریشن کی کاپی ، حج کمیٹی آف انڈیا کے تجویز کردہ پروفورما کے میڈیکل سرٹیفیکٹس جن پر سرکاری میڈیکل آفیسر یا سرکاری ڈاکٹر کے دستخط لازمی ہے ۔ صدر نشین حج کمیٹی محمد سلیم نے عازمین حج سے درخواست کی ہے کہ وہ مقدس سفر حج کے لیے جون 2023 میں تیار رہیں ۔ منتخب عازمین حج کے لیے ضروری ہے کہ وہ حج کی پہلی قسط کی ادائیگی کے بعد اوریجنل انٹرنیشنل پاسپورٹ ، حج درخواست فارم کی کاپی ، میڈیکل سرٹیفیکٹ ، پے منٹ سلپ ، دو عدد پاسپورٹ سائز فوٹوز جس کا پس منظر سفید ہو ۔ کوویڈ 19 سرٹیفیکٹ اور بینک کی تفصیلات تلنگانہ اسٹیٹ حج کمیٹی میں داخل کریں ۔ ایگزیکٹیو آفیسر تلنگانہ حج کمیٹی بی شفیع اللہ ( آئی ایف ایس ) نے مزید بتایا کہ حج کی پہلی قسط کی رقم اسٹیٹ بنک آف انڈیا یا یونین بنک آف انڈیا کے ذریعہ ادا کی جائے ۔ آن لائن چالان hajcommittee.gov.in سے ڈاؤن لوڈ کرسکتے ہیں ۔ انہوں نے کہا کہ تلنگانہ اسٹیٹ حج کمیٹی مقررہ تاریخ پیر 10 اپریل کو حج 2023 کے ویزا کی توثیق کے بعد موصول ہونے والے پاسپورٹ کے لیے ذمہ دار نہیں ہے ۔ مزید تفصیلات کے لیے hajcommittee.gov.in یا فون نمبر 040-23298793 پر ربط کریں یا براہ راست آفس حج ہاوز نامپلی حیدرآباد پر رجوع ہوں ۔۔ ن