لاہور: پاکستان نے ایشیاکپ کے سپر فور مرحلے کے میچ میں گیندبازوں کی شاندار کارکردگی کے بعد امام الحق اور محمد رضوان کی نصف سنچریوں کی بدولت بنگلہ دیش کو 7 وکٹوں سے شکست دے دی۔بنگلہ دیش کی ٹیم ٹاس جیت کر 38.4 اوورز میں 193 رنز پر آوٹ ہوگئی تھی ۔ ہداف کے تعاقب میں پاکستان کی جانب سے امام الحق اور فخر زمان نے اننگز کا محتاط انداز میں اننگز کا آغاز کیا اور اس دوران فخر زمان خوش قسمت بھی رہے جب وہ سلپ میں بنگلہ دیشی فیلڈر کے ہاتھوں کیچ آوٹ ہونے سے بچ گئے۔پاکستان نے 5 اوورز میں 15 رنز ہی بنائے تھے کہ میدان میں فلڈ لائٹس کی خرابی کے باعث میچ کو روک دیا گیا تاہم چند منٹس بعد ہی روشنی بحال ہونے پر کھیل دوبارہ شروع کردیا گیا۔اس کے بعد امام کا ساتھ دینے کپتان بابر اعظم آئے اور دونوں نے مل کر اسکور کو 74 تک پہنچا دیا تاہم اس مرحلے پر بابر زیادہ دیر تک اپنی وکٹ محفوظ نہ رکھ سکے اور 17 رنز بنانے کے بعد تسکین کا شکار بن گئے۔دوسرے اینڈ سے امام الحق نے ذمے دارانہ کھیل پیش کرتے ہوئے ون ڈے کرکٹ میں اپنی 19ویں نصف سنچری مکمل کی۔
ہدف کے تعاقب میں پاکستان کی پہلی وکٹ 35 کے اسکور پر گری جب فخر زمان 20 رنز بناکر شریف السلام کی گیند پر آؤٹ ہوگئے۔گرین شرٹس کی دوسری وکٹ 74 کے اسکور پر گری، بابر اعظم صرف 17 رنز بناکر تسکین احمد کی گیند پر بولڈ ہوگئے۔تیسرے آؤٹ ہونے والے کھلاڑی اوپنر امام الحق تھے، 159 کے اسکور پر وہ 78 رنز بناکر بولڈ ہوگئے، ان کی وکٹ حسن مرزا کے حصے میں آئی۔امام الحق نے 84 گیندوں کا سامنا کیا اور اس دوران 4 چھکے اور 5 چوکے لگائے تھے، انہوں نے محمد رضوان کے ساتھ مل کر تیسری وکٹ پر 85 رنز کی شراکت قائم کی۔بعد ازاں محمد رضوان نے آغا سلمان کے ساتھ مل کر 40 رنز کی ناقابل شکست پارٹنر شپ بنائی، دونوں کھلاڑی بالترتیب 63 اور 12 رنز پر ناٹ آؤٹ واپس لوٹے۔ٹاس جیت کر بیٹنگ کا فیصلہ کرنے والی بنگلادیشی ٹیم کی ابتدائی 4 وکٹیں صرف 47 رنز پر گر گئیں، مہدی حسن مرزا صفر، لٹن داس 14 رنز کو نسیم شاہ اور شاہین آفریدی نے میدان بدر کیا۔اگلے دو کھلاڑیوں اوپنر محمد نعیم 20 اور توحید ہردوئے 2 رنز کو حارث روف نے میدان چھوڑنے پر مجبور کردیا۔پانچویں وکٹ پر کپتان شکیب الحسن اور سینئر بیٹر مشفیق الرحیم نے 120 گیندوں پر 100 رنز کی شراکت قائم کی، اس دوران دونوں ہی کھلاڑیوں نے اپنی اپنی نصف سنچریاں مکمل کیں۔میچ کے دوران شکیب الحسن نے 53 گیندوں پر 7 چوکوں کی مدد سے نصف سنچری بنائی، جو اُن کے ایک روزہ کیریئر کی 54ویں نصف سنچری رہی۔
وہ پاکستان کے خلاف اہم میچ میں بنگلادیش کے آؤٹ ہونے والے پانچویں کھلاڑی تھے، 147 کے مجموعے پر شکیب الحسن کو 53 کے انفرادی اسکور پر فہیم اشرف نے پویلین کی راہ دکھائی۔چھٹی وکٹ پر شمیم حسین نے مشفق الرحیم کے ساتھ مل کر اسکور میں 27 رنز کا اضافہ کیا، 174 کے مجموعے پر افتخار احمد نے امام الحق کی مدد سے شمیم حسین کو 16 کے انفرادی اسکور پر قابو کرلیا۔مشفق الرحیم نے 64 رنز کی باری کے دوران 5 چوکے لگائے، انہیں 190 کے اسکور پر حارث روف نے محمد رضوان کی مدد سے شکار کرلیا، یوں اننگز کی بڑی اور اہم ترین وکٹ بھ فاسٹ بولر کے نام رہی۔اس کے بعد آخری تین کھلاڑی صرف 3 رنز کے اضافے کے ساتھ ہی میدان چھوڑ گئے، گرین شرٹس کے حارث روف نے 4، نسیم شاہ نے 3 جبکہ شاہین آفریدی، افتخار احمد اور فہیم اشرف نے 1،1 وکٹ اپنے نام کی۔
اس سے قبل لاہور میں قذافی اسٹیڈیم میں ٹاس کے بعد گفتگو کرتے ہوئے بنگلادیش کرکٹ ٹیم کے کپتان شکیب الحسن نے کہا کہ اگر ہم زیادہ رنز بناتے ہیں تو اس سے مخالف ٹیم پر دباؤ پڑے گا۔شکیب الحسن نے کہا کہ ہم نے افغانستان کے خلاف جو کچھ کیا اسے دہرانا چاہتے ہیں لیکن ہمیں دنیا کی نمبر ون ٹیم کا سامنا ہے اس لیے ہمیں اپنا بہترین کھیل کھیلنے کی ضرورت ہے۔اس موقع پر پاکستان کرکٹ ٹیم کے کپتان بابر اعظم نے کہا کہ ہم بھی پہلے بیٹنگ ہی کرتے، گزشتہ رات ہم نے دیکھا کہ حالات نے فاسٹ بولرز کی مدد کی، میچ جیتنے کی کوشش کریں گے۔
