ہلاک شدگان میں 3 معصوم اور 10 خواتین شامل،ابتدائی اطلاع کے مطابق سلنڈرمیں آگ لگنے کے سبب ہوئی یہ تباہی
نئی دہلی(ہندوستان ایکسپریس ویب ڈیسک): ریاست جھارکھنڈ کے دھنباد میں واقع کثیرمنزلہ ’آشیرواد ٹاور اپارٹمنٹ‘ میں خوفناک آتشزدگی کے نتیجہ میں کم از کم14 افراد کی جان چلی گئی،جبکہ 20 سے زائد لوگ اس آگ میں جھلس گئے ہیں۔ موصولہ خبر کے مطابق اپارٹمنٹ کی تیسری منزل پرلگنے والی آگ میں 3 بچوں و کچھ خواتین سمیت 14 لوگوں کی موت ہو گئی ۔ کئی لوگ سنگین طور پر زخمی بھی ہیں جنھیں فوری طور پر اسپتال میں داخل کرایا گیا ہے۔ اطلاع کے مطابق ریسکیو آپریشن جاری ہے اور پھنسے ہوئے لوگوں کو نکالنے کی کوششیں ہو رہی ہیں۔ خبروں میں بتایا گیا ہے کہ حادثہ میں اب تک 3 بچے، ایک مرد و 10 خواتین کی جھلسنے سے موت ہو گئی ہے۔ آگ پر قابو پا لیا گیا ہے اور پوری توجہ راحت رسانی کی طرف دی جا رہی ہے۔ اس آتشزدگی سے اپارٹمنٹ میں موجود لوگ بری طرح ڈرے اور سہمے نظر آ رہے ہیں۔ آگ لگنے کی وجہ گیس سلنڈر کا پھٹنا بتایا جا رہا ہے لیکن اس سلسلے میں کوئی تصدیق نہیں ہو سکی ہے۔
झारखंड में दर्दनाक हादसाः अर्पाटमेंट में आग, तीन बच्चों-10 महिलाओं समेत 14 की मौत; मची अफरा-तफरी । #Jharkhand #dhanbad #fire #BreakingNews #Breaking_News #JharkhandNews #FireAccident pic.twitter.com/sLbKjep4I6
— DW Samachar (@dwsamachar) January 31, 2023
آگ لگنے کی اطلاع ملنے کے فوراً بعد فائر بریگیڈ دستہ جائے حادثہ پر پہنچ گیا تھا لیکن گھنٹوں مشقت کے بعد آگ پر قابو پایا جا سکا۔ ریسکیو ٹیم لگاتار آپریشن جاری رکھے ہوئے ہے۔ کہا جا رہا ہے کہ آگ کی لپٹیں شدید تھیں اور جھلسنے والی کئی لاشیں ایک دوسرے سے لپٹی ہوئی تھیں۔ اس اندوہناک حادثہ پرجھارکھنڈ کے وزیر اعلیٰ ہیمنت سورین نے گہرے غم و افسوس کا اظہار کیا ہے۔ ضلع انتظامیہ کے ذریعہ جنگی سطح پر راحت رسانی کا کام جاری ہے اور حادثے میں زخمی لوگوں کو ضروری علاج دستیاب کرایا جا رہا ہے۔ وزیر اعلیٰ نے کہا ہے کہ اس معاملے کو وہ خود دیکھ رہے ہیں۔
زبردست آتشزدگی کے سبب اپارٹمنٹ میں دھواں ہی دھواں دکھائی دے رہا تھا۔ ریسکیو کرنے گئے بینک موڑ تھانہ انچارج بھی اس دھوئیں کی وجہ سے بیہوش ہو گئے۔ ریسکیو آپریشن میں مصروف لوگوں نے فوراً انھیں ٹاور سے باہر نکالا۔ قابل ذکر ہے کہ اس اپارٹمنٹ کے بغل میں ایک اسپتال بھی ہے۔
