پلوامہ حملہ سے متعلق ریمارکس کیلئے ستیہ پال ملک پر امت شاہ کی تنقید

نئی دہلی: حال ہی میں جموں و کشمیر کے سابق گورنر ستیہ پال ملک نے پلوامہ حملہ کو لیکر مودی حکومت پر سنگین الزامات لگائے تھے جس پر مرکزی وزیر داخلہ امیت شاہ نے جواب دیا اور پوچھا کہ جب وہ اقتدار میں تھے، اس وقت وہ خاموش کیوں تھے؟انڈیا ٹوڈے کرناٹک راؤنڈ ٹیبل سے خطاب کرتے ہوئے شاہ نے کہا کہ جب آپ اقتدار میں تھے تو آپ کی روح اس وقت کیوں نہیں بیدار ہوئی۔ اس طرح کے ریمارکس کا لوگوں کو اور میڈیا کو تجزیہ کرنا چاہیے اور اگر یہ سب سچ ہے تو وہ اس وقت خاموش کیوں تھے جب وہ گورنر تھے۔ آپ نے بولنے کے لیے اتنا لمبا انتظار کیوں کیا؟امیت شاہ نے کہا کہ میں تمام ہندوستانیوں کو بتانا چاہتا ہوں کہ بی جے پی کی قیادت والی حکومت، جسے آپ نے بھاری اکثریت سے منتخب کیا، نے ایسا کوئی کام نہیں کیا جسے چھپانے کی ضرورت ہے۔ اگر بی جے پی چھوڑنے کے بعد ذاتی، سیاسی مفاد کے لیے کچھ ریمارکس کیے جاتے ہیں، تو اس کا تجزیہ لوگوں اور میڈیا کو کرنا چاہیے، یہ پوچھے جانے پر کہ ملک کو جموں و کشمیر کا گورنر کیوں مقرر کیا گیا، شاہ نے کہا کہ انہوں نے طویل عرصہ بی جے پی میں کام کیا ہے اور وہ پارٹی کے نائب صدر بھی رہے ہیں اور اسی وجہ سے انہیں یہ رول دیا گیا تھا۔یہ ایک حکمت عملی کا فیصلہ تھا، کبھی کبھی سیاست میں ایسا ہوتا ہے۔
اگر کوئی وقتاً فوقتاً اپنا رویہ بدل لیتا ہے تو ہم کیا کر سکتے ہیں، لوگوں کو سمجھنا چاہیے۔‘‘ستیہ پال ملک کو ان کے الزامات کے بعد سنٹرل بیورو آف انویسٹی گیشن (سی بی ا?ئی) کی طرف سے طلب کیے جانے کے بارے میں بات کرتے ہوئے، امیت شاہ نے کہا کہ اس میں کوئی سچائی نہیں ہے کہ ملک کو حکومت کے خلاف بولنے کے لیے بلایا گیا ہے۔امیت شاہ نے کہا کہ ‘‘انہیں دوسری یا تیسری بار بلایا گیا ہے۔ تحقیقات جاری ہیں، کوئی نئی معلومات یا ثبوت سامنے آیا ہوگا اسی لیے انہیں تیسری بار بلایا گیا ہے۔ اس میں کوئی حقیقت نہیں ہے کہ انہیں ہمارے خلاف بولنے کے لیے بلایا گیا ہے،‘‘حال ہی میں، ستیہ پال ملک، جو پلوامہ دہشت گردانہ حملے کے وقت جموں و کشمیر کے گورنر تھے، انہوں نے الزام لگایا تھا کہ اس حملے میں ہلاک ہونے والے نیم فوجی اہلکاروں کو مرکز کی طرف سے ہوائی جہاز کے ذریعے بھیجنے سے "انکار” کیا گیا تھا اور حملے کی دھمکی کے باوجود نیم فوجی اہلکاروں کو سڑک کے ذریعے بھیجا گیا تھا۔