ایشیا کپ کا آغازآج،ملتان کرکٹ اسٹیڈیم میں ہوگا ایونٹ کا باقاعدہ افتتاح

ملتان:پاکستان کی میزبانی میں ایشیا کپ ون ڈے کرکٹ ٹورنامنٹ کا آج سے آغاز ہو رہا ہے اور ایونٹ کے افتتاحی میچ میں میزبان ٹیم کا مقابلہ نیپال سے ہو گا۔ملتان کرکٹ اسٹیڈیم میں بدھ کو ایونٹ کے باقاعدہ آغاز سے قبل افتتاحی تقریب ہو گی جس میں پاکستانی گلوکارہ آئمہ بیگ اور نیپالی گلوکارہ تھریشالہ گرونگ پرفارم کریں گی۔ایونٹ کی افتتاحی تقریب کے بعد پاکستانی وقت کے مطابق دوپہر ڈھائی بجے پاکستان اور نیپال کی ٹیمیں مدِ مقابل ہوں گی۔
ایونٹ میں چھ ٹیمیں شریک ہیں جنہیں دو گروپ میں تقسیم کیا گیا ہے۔ پاکستان، بھارت اور نیپال کی ٹیمیں گروپ اے میں جب کہ بنگلہ دیش، افغانستان اور سری لنکا کی ٹیمیں گروپ بی میں شامل ہیں۔ایونٹ میں مجموعی طورپر 11 میچ کھیلے جائیں گے۔ ملتان میں افتتاحی میچ کے بعد تین میچ لاہور میں ہوں گے جب کہ نو میچز سری لنکا میں کھیلے جائیں گے۔
ایونٹ کے افتتاحی میچ میں نیپال کے خلاف پاکستان کی گیارہ رکنی ٹیم، کپتان بابر اعظم، نائب کپتان شاداب خان، فخر زمان، امام الحق، محمد رضوان، سلمان علی آغا، افتخار احمد، محمد نواز، نسیم شاہ، شاہین شاہ آفریدی اور حارث رؤف پر مشتمل ہے۔
پاکستان کرکٹ بورڈ نے گزشتہ روز ہی پہلے میچ کے لیے ٹیم کا اعلان کیا تھا۔دوسری جانب نیپال کی11 رکنی ٹیم کشال بھرٹیل، آصف شیخ، بھیم شرکی، روہت پوڈل، کشال مالا، دپندرا سنگھ ایری، گلسان جاہ، سومپل کامی، کرن کے سی، سندیپ لاماچانے اور لالت راجبانشی پر مشتمل ہے۔ملتان کا موسم گرم اور خشک ہونے کا امکان ہے اور درجہ حرارت 30 ڈگری سینٹی گریڈ تک رہنے کا امکان ہے۔نیپال کے خلاف افتتاحی میچ میں میزبان ٹیم کو ایڈوانٹج حاصل رہے گا۔ تماشائیوں کی سپورٹ کے ساتھ ساتھ گرین شرٹس کو اس گراؤنڈ پر کھیلنے کا تجربہ ہے جب کہ نیپال کی ٹیم پہلی مرتبہ ملتان میں کھیلے گی۔پاکستان نے گزشتہ برس ویسٹ انڈیز کے خلاف ملتان اسٹیڈیم میں تین ایک روزہ میچز کی سیریز کھیلی تھی اور مہمان ٹیم کو وائٹ واش کیا تھا۔