پولیس نے بی جے پی لیڈر اس کے شوہر اوردو ڈاکٹروں سمیت 8 افراد کو پکڑا،چائلڈ اسمگلنگ ریکٹ کا انکشاف
متھرا (ہندوستان ایکسپریس ویب ڈسک):اتر پردیش کے متھرا ریلوے اسٹیشن پر گزشتہ ہفتے 7 ماہ کا ایک بچہ اپنے ماں-باپ کے بغل میں سوتے ہوئے چوری ہو گیا تھا، جو فیروز آباد میں ایک بی جے پی کونسلر کے گھر سے برآمد ہوا ہے۔ پولیس نے بی جے پی لیڈر، اس کے شوہر اور دو ڈاکٹروں سمیت 8 افراد کو گرفتار کر چائلڈ اسمگلنگ ریکٹ کا انکشاف کیا ہے۔ گرفتار کیے گئے لوگوں میں وہ شخص بھی شامل ہے جو بچے کو پلیٹ فارم سے اٹھاتے وقت کیمرے میں قید ہو گیا تھا۔
پولیس نے جانکاری دیتے ہوئے بتایا کہ اس نے بچوں کو چرانے اور فروخت کرنے والے ریکٹ کا پردہ فاش کیا ہے۔ متھرا سے 100 کلومیٹر دور فیروز آباد میں بی جے پی کی کونسلر ونیتا اگروال اور ان کے شوہر نے مبینہ طور پر اس بچے کو دو ڈاکٹرس سے 1.8 لاکھ روپے میں خریدا تھا۔ یہ جوڑا بیٹا چہاتا تھا، کیونکہ دونوں کو پہلے سے ایک بیٹی ہے۔
متھرا میں ریلوے پولیس کے ذریعہ منعقد پریس کانفرنس میں پولیس افسران نے بچے کو اس کی ماں کے حوالے کر دیا۔ اس دوران 500 روپے کے نوٹوں کی گڈیاں بھی پولیس نے دکھائیں جو گرفتار ڈاکٹروں کے پاس سے برآمد ہوئی ہیں۔ دوسری طرف گرفتار کونسلر یا بی جے پی کی طرف سے اب تک اس معاملے میں کوئی رد عمل سامنے نہیں آیا ہے۔
پولیس افسر محمد مشتاق نے بتایا کہ پیسوں کے لیے ٹریفکنگ میں شامل ایک گینگ کے ذریعہ یہ اغوا کیا گیا تھا۔ انھوں نے بتایا کہ دیپ کمار نام کا شخص بچے کو لے کر بھاگا تھا۔ یہ ایک گینگ کا رکن ہے جس میں ہاتھرس ضلع میں اسپتال چلانے والے دو ڈاکٹرس شامل ہیں۔ کچھ طبی اہلکار اور دیگر لوگ بھی گینگ میں شامل ہیں۔ جن کے گھر بچہ ملا، انھوں نے بتایا کہ ان کی صرف ایک بیٹی ہے اور وہ بیٹا چاہتے تھے، اس لیے بچے کو خریدا۔
