کانگریس لیڈر نے کہا کہ مردم شماری اور حد بندی کا مطلب ہے کہ 10سال اس کے لاگو ہونے کا امکان نہیں ہے
نئی دہلی( یو این آئی ) کانگریس لیڈر راہل گاندھی نے وزیر اعظم نریندر مودی کو براہ راست نشانہ بناتے ہوئے آج ان کی حکومت کو (دیگر پسماندہ طبقات) او بی سی اور خواتین مخالف قرار دیتے ہوئے کہا کہ پارلیمنٹ میں خواتین کے لیے ریزرویشن بل پاس کروا تو دیا ہے لیکن ابھی اسے وہ نافذ نہیں کررہے ہیں۔مسٹر گاندھی نے جمعہ کو یہاں پارٹی ہیڈکوارٹر میں ایک پریس کانفرنس میں خصوصی اجلاس کے انعقاد کی تعریف کی لیکن کہا کہ خواتین ریزرویشن بل لاکر اسے نافذ کرنے کے لئے جو شرائط رکھی گئی ہیں وہ چونکانے والی ہیں اور یہ واضح ہو گیا ہے کہ خواتین کو ریزرویشن دینے کا اس حکومت کا فی الحال کوئی ارادہ نہیں ہے۔
LIVE: Media Interaction | AICC HQ, New Delhi https://t.co/z4S6Kxn4rv
— Rahul Gandhi (@RahulGandhi) September 22, 2023
انہوں نے کہا کہ خواتین کے ریزرویشن کے حوالے سے سب کی توجہ ہٹانے کا کام ہوا ہے۔ یہ بل اب نافذ ہونے والا نہیں ہے اور 10 سال تک اس کے نافذ ہونے کا کوئی امکان نہیں ہے۔ اس کے بعد کیا ہوگا اس بارے میں ابھی کچھ نہیں کہا جا سکتا۔ وجہ یہ ہے کہ اس کے نفاذ سے پہلے مردم شماری ہونی ہے اور اس کے بعد حد بندی ہونی ہے، اس طرح اس بل پر فوری عمل نہیں ہو سکتا۔ کانگریس لیڈر نے کہا کہ اگر حکومت اس بل کو نافذ کرنا چاہتی ہے تو اسے فوری طور پر اس سے حد بندی اور مردم شماری سے متعلق شرائط کو ہٹانا چاہئے اور بل کو اسے فوری طور پر نافذ کرنا چاہئے۔انہوں نے او بی سی کے تعلق سے بھی حکومت پر حملہ کیا اور کہا کہ مرکزی حکومت کو 90 بااثر سکریٹریز چلا رہے ہیں جن میں سے صرف تین او بی سی زمرہ کے ہیں۔ یہ ملک کی بڑی آبادی کے مفاد میں نہیں ہے، اس لیے ہر فرد کو اس کی آبادی کے مطابق حصہ ملنا چاہیے۔
