عدالت نے دہلی یونیورسٹی کے فیصلے کو ‘فطری انصاف کی خلاف ورزی’ قرار دیا
نئی دہلی:دہلی ہائی کورٹ نے وزیر اعظم نریندر مودی سے متعلق بی بی سی کی مشہور دستاویزی فلم دکھانے پر دہلی یونیورسٹی سے معطل طالب علم کو راحت دی ہے۔ خبروں کے مطابق دہلی ہائی کورٹ کے جج جسٹس پروشندر کمار کورو نے اپنے فیصلے میں دہلی یونیورسٹی کے پی ایچ ڈی کے طالب علم اور کانگریس کے طلبہ ونگ این ایس یو آئی کے سکریٹری لوکیش چگ کا داخلہ بحال کرنے کا حکم دیا ہے۔
کورٹ نے مذکورہ اسکالر کو راحت دیتے ہوئے تبصرہ کیاکہ "عدالت ڈی یو کے 10 مارچ 2023 کے حکم کو برقرار رکھنے سے قاصر ہے۔ اس حکم پر روک لگا دی گئی ہے۔ درخواست گزار کا داخلہ بحال کر دیا گیا ہے۔”
عدالت نے یونیورسٹی کے فیصلے کو ‘فطری انصاف کی خلاف ورزی’ قرار دیا۔ ذہن نشیں رہے کہ اس سے قبل گزشتہ ماہ کی 10 تاریخ کو دہلی یونیورسٹی کے رجسٹرار نے لوکیش چگ کو ایک سال کے لیے معطل کر دیا تھا اور انہیں امتحان میں شامل ہونے سے روک دیا تھا۔چگ پر یونیورسٹی نے بی بی سی کی ایک دستاویزی فلم کی اسکریننگ کے دوران کیمپس میں امن و امان کو خراب کرنے کا الزام لگایا تھا۔
