نئی دہلی (یو این آئی/ایجنسیاں) انفورسمنٹ ڈائریکٹوریٹ (ای ڈی) نے منی لانڈرنگ کے معاملات کی تحقیقات کے سلسلے میں منگل کو اوکھلا عام آدمی پارٹی (آپ ) کے ایم ایل اے امانت اللہ خان کے گھر کی تلاشی لی۔ آپ ایم ایل اے کو دہلی پولیس کی اینٹی کرپشن برانچ نے تقرریوں میں مبینہ بے ضابطگیوں سے متعلق ایک معاملے میں گرفتار کیا تھا۔ذرائع کے مطابق ای ڈی نے یہ کارروائی عام آدمی پارٹی کے لیڈر اور رکن پارلیمنٹ سنجے سنگھ کی رہائش گاہ پر چھاپہ کی کارروائی کے بعد گرفتار کرنے اور دہلی شراب پالیسی سے متعلق ایک معاملے میں 10 گھنٹے سے زیادہ وقت تک پوچھ گچھ کرنے کے بعد کی ہے۔
خبروں کے مطابق مرکزی تحقیقاتی ایجنسی نے دہلی وقف بورڈ میں غیر قانونی تقرریوں سے متعلق ایک مبینہ بدعنوانی کے معاملے میں ان کے خلاف سنٹرل بیورو آف انویسٹی گیشن کی ایف آئی آر اور دہلی کے انسداد بدعنوانی بیورو کی ایف آئی آر کا نوٹس لیا ہے۔ رکن اسمبلی امانت اللہ خان دہلی وقف بورڈ کے چیئرمین ہیں۔سی بی آئی اور دہلی حکومت کے اے سی بی دونوں نے دہلی وقف بورڈ کی مبینہ مالی بے ضابطگیوں کے سلسلہ میں الگ الگ کیس درج کیے ہیں۔ امانت اللہ خان کو گزشتہ سال اے سی بی نے گرفتار بھی کیا تھا اور دعویٰ کیا تھا کہ تلاشی کے دوران کچھ ڈائریاں برآمد کی گئی ہیں۔ یہ ڈائریاں امانت اللہ خان کے قریبی ساتھی لڈن لدن خان سے برآمد ہوئی تھیں۔ ڈائریوں میں مبینہ طور پر حوالہ کے ذریعے لاکھوں کی لین دین کا ذکر تھا۔ ان میں زیادہ تر ٹرانزیکشنز غیر قانونی منی لانڈرنگ کی تھیں، کچھ ٹرانزیکشن بیرون ملک سے بھی ہوئی تھیں۔ اے سی بی نے اپنی تحقیقات ای ڈی کے ساتھ شیئر کی تھیں۔
