ممتا سے متعلق دلیپ گھوش کی بدزبانی بیان پر الیکشن کمیشن نے رپورٹ طلب کی

کلکتہ 26مارچ (یواین آئی)الیکشن کمیشن نے مغربی بردوان کے ضلع مجسٹریٹ سے بی جے پی لیڈر دلیپ گھوش کے وزیر اعلیٰ ممتا بنرجی سے متعلق مبینہ نازیبا بیان پر رپورٹ طلب کی ہے۔ بردوان درگاپور لوک سبھا حلقہ سے بی جے پی امیدوار دلیپ گھوش پر براہ راست انتخابی ضابطہ اخلاق کی خلاف ورزی کا الزام لگایا گیا ہے۔ریاست کے چیف الیکٹورل آفیسر (سی ای او) کے مطابق ضلع مجسٹریٹ سے رپورٹ طلب کی گئی ہے۔ رپورٹ آنے کے بعد دہلی میں کمیشن کے دفتر بھیج دیا جائے گا۔ کمیشن تحقیقات کرکے فیصلہ دے گا۔دلیپ گھوش پر الزا م ہے کہ منگل کی صبح درگاپور شہر میں صبح کی سیر کے دوران ممتا پر ذاتی طور پر حملہ کیا ہے۔
بی جے پی کے سابق ریاستی صدر دلیپ نے منگل کو بی جے پی کے مقامی رہنماؤں اور کارکنان کے ساتھ درگاپور کے چتورنگا گراؤنڈ سے شہر کے امبوجا علاقے تک صبح کی سیر کی۔ وہاں انہوں نے اپنے حریف کے بارے میں کہاکہ ترنمول کانگریس کے امیدوار کیرتی آزاد نے ملک کی نمائندگی کی۔ میں بطور کرکٹر ان کی عزت کرتا ہوں۔ لیکن یہ سیاست ہے۔ اور وہ دیدی کا ہاتھ پکڑ کر آئے ہیں۔ دیدی کی ٹانگیں کانپ رہی ہیں۔ ان کے گھروالوں نے انہیں یہاں ڈھکیل دیا ہے ۔مگر انہیں پتہ ہی نہیں چلے گا کہ بنگال کے عوام نے انہیں کب ڈھکیل دیا ہے۔
دلیپ گھوش کا دعویٰ ہےکہ ’’بہار، یوپی سے دیدی گوا گئی اور کہا کہ وہ گوا کی لڑکی ہے۔ تریپورہ گئی اور کہا کہ وہ تریپورہ کی بیٹی ہیں۔اس کے بعد انہوں نے ممتا بنرجی پر ذاتی حملہ کرتے ہوئے ان کے والد سے متعلق سوال کیا۔کھڑگپور سے بی جے پی ممبر پارلیمنٹ کی مذمت کرتے ہوئے، مغربی بردوان ضلع ترنمول کانگریس کے صدر نریندر ناتھ چکرورتی نے کہاکہ شوبھندو ادھیکاری کی وجہ سے وہ مدنی پور سے درگاپور آئے ہیں۔ اب وہ ایسے بیلگام بیانات سے بازار گرم کرنا چاہتے ہیں۔
ترنمول کانگریس نے ممتا بنرجی سے متعلق دلیپ گھوش کے تبصروں پر احتجاج کرتے ہوئے الیکشن کمیشن سے رجوع کیا۔ اس کے پیش نظر کمیشن نے رپورٹ طلب کی ہے۔ اس کا جواب دیتے ہوئے دلیپ گھوش نے کہا کہ میں الیکشن کمیشن کو بتاؤں گا کہ کیا کہنا ہے۔ ترنمول ہر بار انتخابات سے پہلے خواتین کا کارڈ کھیلتی ہے۔مجھے سوال پوچھنے کا حق ہے۔ ہر کوئی نہیں کر سکتا۔ میں نے کیا الیکشن کمیشن کو جواب دوں گا۔ سندیش کھالی کے عوام جانتے ہیں کہ کون بدمعاش ہے۔