تہران، 20 مئی (یواین آئی ) ایرانی صدر آیت اللہ ابراہیم رئیسی کا جسد خاکی تشییع کے لئے قم لایا جائے گا۔مہر خبررساں ایجنسی کے مطابق صدر رئیسی اور ان کے ہمراہ جاں بحق ہونے والوں کی لاشیں اس وقت تبریز کے مرکز شہداء میں ہیں جہاں سے کل منگل کی صبح قم منتقل کیا جائے گا۔منگل کی سہ پہر قم میں صدر رئیسی اور ان کے ساتھی شہداء کی تشییع اور نماز جنازہ ہوگی۔ شہید صدر رئیسی کی نماز جنازہ رہبر معظم انقلاب کی اقتدا میں ادا کی جائے گی اور جمعرات کو مشہد میں حرم امام رضا علیہ السلام میں ان کو دفن کیا جائے گا۔
ادھر ایران کے مسلح افواج کے چیف آف اسٹاف نے آج صبح ایک اعلی سطحی وفد کو صدر کے ہیلی کاپٹر سانحے کی جانچ پڑتال کے لئے تعینات کردیا۔ ہردل عزیز، باصلاحیت اور محنتی صدر اور عالم مجاہد سید ابراہیم رئیسی اور ان کے ساتھیوں کی شہادت کے بعد، مسلح افواج کے چیف آف اسٹاف بریگيڈیئر جنرل محمد باقری نے پیر کی صبح کو جنرل علی عبداللہی کو حکم دیا کہ شہری اور فوجی ہوابازی کے فنی ماہرین کے تعاون سے اس افسوسناک حادثے کی جامع تحقیقات انجام دیں۔رپورٹ کے مطابق، اس ٹیم نے جائے حادثہ پر فوری طور پر پہنچ کر انویسٹیگیشن کا سلسلہ شروع کردیا ہے جس کی تفصیلات کے بارے میں اطلاع دی جائے گی۔ یاد رہے کہ صدر سید ابراہیم رئیسی ایران اور آذربائیجان کے مابین ڈیم کے ایک منصوبے کا افتتاح کرکے تبریز شہر لوٹ رہے تھے جہاں ان ہیلی کاپٹر حادثے سے دوچار ہوگیا۔ اس واقعے میں صدر مملکت، وزیر خارجہ، تبریز شہر کے امام جمعہ، صوبہ مشرقی آذربائیجان کے گورنر اور صدر رئیسی کے محافظوں کے ہیڈ اور پائلٹس کی ٹیم جاں بحق ہوگئے۔
اس بیچ صوبہ مشرقی آذربائیجان کے اسلامی تبلیغات کے ڈائریکٹر جنرل نے کہا کہ ہیلی کاپٹر حادثے میں جاں بحق ہونے والوں کی نماز جنازہ کے لئے کئے گئے انتظامات کے مطابق کل صبح 9:30 بجے تبریز سے شہداء کی میتیں روانہ کر دی جائیں گی۔ مہر خبررساں ایجنسی کی رپورٹ کے مطابق، صوبہ مشرقی آذربائیجان کے اسلامی تبلیغات کے ڈائریکٹر جنرل نے کہا کہ ہیلی کاپٹر حادثے میں جاں بحق والوں کی نماز جنازہ کے لئے کئے گئے انتظامات کے مطابق کل صبح 9:30 بجے تبریز سے شہداء کی میتیں روانہ کر دی جائیں گی۔
مشرقی آذربائیجان کے اسلامی تبلیغات کے ڈائریکٹر جنرل حجت الاسلام سید محمود حسینی نے مہر نیوز کے نمائندے سے گفتگو کرتے ہوئے کہا کہ کل صبح ساڑھے نو بجے شہید آیت اللہ رئیسی اور ان کے ساتھیوں کی میتوں کو تبریز کے شہداء اسکوائر سے ایئرپورٹ لے جایا جائے گا جہاں سے تہران روانہ کر دی جائیں گی۔قبل ازیں انہوں نے کہا کہ رہبر معظم انقلاب کی اقتداء میں بدھ کے روز شہداء کی نماز جنازہ ادا کی جائےگی، محبوب صدر رئیسی کے جسد خاکی کو جمعرات کو مشہد مقدس میں سپرد خاک کیا جائے گا۔ جب کہ امام جمعہ کی میت کو جمعرات کو تبریز میں سپرد خاک کیا جائے گا اور صوبہ مشرقی آذربائیجان کے نوجوان اور محنتی گورنر کی تدفین اسی دن مراغہ قصبے میں عمل میں لائی جائے گی۔ اس وقت شہداء کے جسد ہائے خاکی کو سپاہ پاسداران انقلاب کی عاشورہ کور کی تحویل میں دیا گیا ہے۔
