حلب( ایجنسیاں)شام کے سرکاری ذرائع ابلاغ نے بتایا ہے کہ منگل کی شب اسرائیلی فوج نے شمالی شہرحلب کے ہوائی اڈے پرفضائی حملہ کیا ہے جس سے رن وے کو نقصان پہنچا ہے،وہ ناکارہ ہوگیا ہے اور اس کے بعد وہاں سے پروازیں معطل کردی گئی ہیں۔
شام کے فوجی ذرائع نے بتایا کہ اسرائیل نے بحر متوسط سے یہ نیا میزائل حملہ کیا ہے اور اس نے ساحلی شہراللذاقیہ کے مغربی علاقے سے مقامی وقت کے مطابق رات 8 بج کر 16 منٹ (1716 جی ایم ٹی) پر ہوائی اڈے پرمیزائل داغے ہیں۔
شام کے سرکاری خبررساں ادارے (سانا) نے قبل ازیں یہ خبردی تھی کہ شامی فضائی دفاع نے اسرائیلی فوج کے داغے میزائلوں کو روک لیا اور ان میں سے متعدد کومار گرایا ہے۔
اسرائیل کا ایک ہفتے سے بھی کم عرصے میں حلب یہ دوسرا مبینہ حملہ ہے۔31 اگست کو بھی اسرائیلی فوج نے ہوائی اڈے پر راکٹ داغے تھے جس کے نتیجے میں مادی نقصان ہوا تھا۔
علاقائی سفارتی اور انٹیلی جنس ذرائع کا کہنا ہے کہ اسرائیل ایران کی جانب سے حزب اللہ سمیت شام اور لبنان میں اتحادیوں کو اسلحہ کی ترسیل کوروکنا اور اس مقصد کے لیے فضائی سپلائی لائنوں کے بڑھتے ہوئے استعمال کو ختم کرنا چاہتا ہے۔اس مقصد سے اس نے شام کے ہوائی اڈوں پرمیزائل اور راکٹ حملے تیزکردیے ہیں۔
ایران نے اسلحہ کی زمینی راستے سے منتقلی میں رکاوٹوں کے بعد شام میں اپنی افواج اور اتحادی جنگجوؤں کو فوجی سازوسامان پہنچانے کے اب زیادہ قابل اعتماد ذریعے کے طور پر فضائی نقل وحمل کو اپنایا ہے۔
ایران کے حمایت یافتہ علاقائی اتحاد کے کمانڈرنے رائٹرز کو بتایا کہ گذشتہ ہفتے ہونے والے حملے میں حلب کے ہوائی اڈے کو نقصان پہنچا تھا اور یہ ایران سے طیارے کی آمد سے عین قبل کیا گیا تھا۔
